Hlynur Þór Magnússon

29.3.2007

Heimsókn frá Reykhólaskóla - kærar þakkir!

Það var bankað hjá mér áðan. Úti var hópur af krökkum úr Reykhólaskóla ásamt Ástu Sjöfn kennara. Erindið? Að gefa mér köku! Við hana voru festir tveir miðar. Á öðrum stendur: Til Hlyns, frá krökkunum í Reykhólaskóla. Á hinum: Hamingjan er ómetanleg en kostar ekkert. Þar er líka teiknuð andlitsmynd sem kannski á að vera af mér. Minnir samt frekar á brosandi kött, að mér finnst. Ef til vill minni ég sjálfur á brosandi kött. Ekki þætti mér það neitt slæmt, síður en svo!

Já, núna er þemavika í Reykhólaskóla og nemendurnir biðja íbúa Reykhólahrepps um liðveislu í því að gera okkar góða samfélag enn betra. Krakkanir minna okkur meðal annars á að við getum boðið góðan dag með bros á vör, hjálpað öðrum, tekið tillit til annarra, verið jákvæð og látið hjá líða að kvarta að óþörfu. Og ekki síst: Við getum látið fólk vita að okkur þyki vænt um það.

Því má bæta við, að ég er ekki alls ókunnugur samfélaginu góða í Reykhólahreppi. Það er einmitt helsta ástæða þess, að ég er kominn hingað aftur og sestur hér að á ný eftir meira en aldarfjórðungs fjarveru.

Núna ætla ég að fá mér kökubita og hugsa á meðan til vina minna og ættingja í Reykhólaþorpi og um allan Reykhólahrepp að fornu og nýju. Mér þykir vænt um Reykhólasveitina og héraðið allt, ættarslóðir móður minnar. Hún fæddist hér við Djúpafjörðinn og afmælisdagurinn hennar var í gær.

Meginflokkur: Bloggar | Aukaflokkur: Vinir og fjölskylda | Facebook

Athugasemdir

Það væri óskandi að þessi fallegi andi sem þarna birtist, næði eyrum fleiri og víðar. Þú ert greinilega vel í sveit settur þar sem þú ert.

Halldór Egill Guðnason, 29.3.2007 kl. 15:48

Nemendurnir í Reykhólaskóla núna eru meira og minna börn krakkanna sem ég kenndi ...

Hlynur Þór Magnússon, 29.3.2007 kl. 15:57

Góður. Hlýtur að vekja stolt að sjá hve vel tókst til.

Halldór Egill Guðnason, 29.3.2007 kl. 16:30

En fallegt

erlahlyns.blogspot.com, 29.3.2007 kl. 20:10

Skemmtilegt uppátæki og segir mikið um þig

Heiða B. Heiðars, 30.3.2007 kl. 01:56

Heiða mín: Þetta er ekki neinn vitnisburður um mig, heldur um fólkið hér við innanverðan Breiðafjörð. Bæti við: Þegar ég kom hér fyrst í gamla daga skrapp ég fljótlega í heimsókn að Miðjanesi, til Játvarðar Jökuls Júlíussonar heitins, bónda og fræðimanns, þess stórmerkilega manns, sem var svo gersamlega lamaður, að hann skrifaði bækur sínar á rafmagnsritvél með pinna sem hann hafði í munninum. Hann sagði mér strax hvernig við værum skyldir. Ég var ekki með þau tengsl á hreinu en hann þurfti ekki að fletta neinu upp í þeim efnum. Þessi fyrsti fundur okkar er mér ógleymanlegur. Líka er Sveinn Guðmundsson á Miðhúsum ógleymanlegur maður. Bóndi og kennari í áratugi, fréttaritari Morgunblaðsins í áratugi. Svo ekki sé nú minnst á þau hjónin Jens Guðmundsson kennara og skólastjóra á Reykhólum og hans góðu konu Jóhönnu Ebenezersdóttur.

Svona mætti lengi, lengi telja.

Hlynur Þór Magnússon, 30.3.2007 kl. 07:59

Nefni til gamans: Moggabloggarinn Þrymur Sveinsson er sonur Sveins á Miðhúsum og gamall nemandi minn. Moggabloggarinn Hrafnkell Daníelsson er sonur Daníels Jónssonar, sonar Jóns Daníelssonar, hins fræga manns í Breiðafjarðareyjum, en mamma og hann voru systkinabörn.

Hlynur Þór Magnússon, 30.3.2007 kl. 08:46

Biblíunöfn svokölluð eru algeng í breiðfirskri ætt minni. Daníel Guðmundsson heitinn, móðurbróðir minn, er einn þeirra manna sem ég met einna mest allra sem ég hef kynnst á lífsleiðinni.

Hlynur Þór Magnússon, 30.3.2007 kl. 08:50