Morgunandakt

Ég vandist því að vikan fyrir páska væri kölluð dymbilvika en vikan á eftir páskavika. Margir tala hins vegar um þessa viku sem páskaviku - svo sem að skreppa á skíði til Ísafjarðar í páskavikunni. Svona breytast hlutirnir og lítið við því að segja. Maður þumbast við lengi vel en lætur að lokum undan ofureflinu. Fáir myndu skilja bloggið mitt ef ég ritaði mál Egils og Snorra.

 

Hundurinn Dexter slapp áðan. Ég opnaði fyrir honum út á pallinn en gætti þess ekki að hliðið var opið. Þegar ég ætlaði litlu síðar að setja hann í bandið í garðinum var hann horfinn.

 

Ekki þurfti ég að leita hans lengi. Ég fór rakleiðis að húsi þar sem íturvaxin tík á heima og þar var hundurinn fyrir utan. Cherchez la femme. Hann var ekki byrjaður að syngja undir glugganum hennar. Vona ég. Ekki klukkan hálfátta á skírdagsmorgni.

 

Morgunninn sjálfur er skír og fagur. Láréttir sólargeislar við Breiðafjörð. Hægviðri, dálítið andkalt. Í dag er hinn hreini dagur, hreinleikans dagur. Á morgun er dimmur dagur.

 

Til upprifjunar varðandi hundinn Dexter: Ég á hann ekki heldur Erla dóttir mín. Hann hefur dvalist hjá mér í rúma tvo mánuði. Deili á nafni hans koma fram hér í gestabókinni. Sjá líka þessa færslu:

 

30.01.2007 Með tetanus í höfðinu

 

Athugasemdir

[Eiður Svanberg Guðnason, 5.4.2007 kl. 09:47]

Íhaldssemi er góð,þegar tungan á í hlut. Dymbilvika er vikan  fyrir páska.Henni  fylgir páskavikan. Það ber  að halda þessari  ágætu málvenju og alls ekki gefast upp fyrir  þeim reiðareksmönnum,sem láta sig  þróun og örlög  íslenskrar tungu engi skipta.

[halkatla, 5.4.2007 kl. 12:09]

ja, ég vil helst hafa þessa orðanotkun á hreinu

[Halldór Sigurðsson, 5.4.2007 kl. 17:38]

Rétt er það --nú er Dymbilvika og páskavikan byrjar víst á sunnudag

[Magnús Jónsson, 5.4.2007 kl. 20:21]

Dexter karlin fór á flakkFinna vildi sprund.Hlynur honum tók þá takEnda batt á morgun dund. 

[Ásthildur Cesil Þórðardóttir, 5.4.2007 kl. 23:01]

Þetta er náttúrlega Ómars mál, náttúran kallar.