Jónína Benediktsdóttir og reikult þangið í Morgunblaðinu

Jónína Benediktsdóttir kvartar á bloggi sínu yfir „fjandans þvælingi“ hjá Mogganum. „Endalausar breytingar á staðsetningu efnisins og ekki nokkur leið að finna ýmislegt sem átt hefur sér fasta síðu síðan á fyrri hluta síðustu aldar“, segir hún.

 

Eins og út úr mínu hjarta talað!

              

Skáldið sá þetta fyrir:

                     

Reikult er rótlaust þangið,         

rekst það um víðan sjá,         

straumar og votir vindar           

velkja því til og frá.         

                      

Þarna er auðvitað átt við efnisþættina sem flæmast fram og aftur í Mogganum. Hinn „víði sjár“ er Morgunblaðið en „votir vindar“ eru nýmóðinsöflin á ritstjórninni.

        

Þegar ég var upp á mitt besta á fyrri hluta síðustu aldar var hægt að ganga að hlutunum vísum í Morgunblaðinu. Allt er í heiminum hverfult sagði Jónas en það gilti ekki um Moggann.

 

Ekki fyrr en núna.

              

Eins og kunnugt er, þá standa núna yfir tímar sem nefndir eru „þessir síðustu og verstu tímar“. Einkenni þeirra eru lausung og lygi, skeggöld og skálmöld og allt það; hverfa af himni heiðar stjörnur.

               

Finnast æsir                

á Iðavelli             

og um moldþinur           

máttkan dæma             

og minnast þar              

á Morgunblaðið                 

og á Fimbultýs            

fornar rúnar.         

           

            

Ég tek heilshugar undir eftirfarandi orð Jónínu Benediktsdóttur:

            

Moggafólk, hættið nú að pirra okkur með þessum breytingum.

 

Athugasemdir

[Bjarki Tryggvason, 6.5.2007 kl. 12:12]

Sammála þér:)

[Sigurður Þór Guðjónsson, 6.5.2007 kl. 14:06]

Hva, ert þú enn að?

[Ingólfur H Þorleifsson, 6.5.2007 kl. 21:14]

Til hamingju með 80 ára afmælið  mikið líður tíminn hratt á gervihnattaöld.