Hornsteinar og krosstré - í boði mbl.is

Eiginlega finnst mér hálfundarlegt að blogga hér í boði mbl.is og nota svo vettvanginn til að drulla yfir fyrirtækið og starfsfólk þess. Nánast eins og að vera í kvöldverðarboði og lýsa frati á matinn og gestgjafana. Hér er ég einkum að hugsa um síðustu færslu mína, en hún snýr að þeim sem annast fréttaskrifin á mbl.is.

 

Það liggur við að ég iðrist þessara ummæla vegna þess hve stórkarlaleg og lítilsvirðandi þau eru. Engu að síður læt ég þau standa. Mér þykja vinnubrögðin við fréttaskrifin á mbl.is iðulega fyrir neðan allar hellur. Mér skilst að ég sé ekki einn um það viðhorf. Að vísu er ég ekki vanur að spyrja aðra hvað mér finnst.

 

Ef ég sæi einhvern misþyrma hestinum mínum - reyndar á ég ekki hest - þá yrði ég reiður. En þó að ég eigi ekki hest, þá á ég hlutdeild í íslenskri tungu. Þannig er a.m.k. tilfinningin. Og þegar þeir stóru og öflugu misþyrma henni, þá sárnar mér.

 

Þeir stóru og öflugu eru fjölmiðlarnir. Þegar við þetta bætist að mér þykir vænt um tiltekna fjölmiðla, þá sárnar mér tvöfalt, ef þannig mætti að orði komast. Þegar krosstrén bregðast, eða þannig.

 

Ég geri alveg sérstakar kröfur til Ríkisútvarpsins og Morgunblaðsins. Mér þykir vænt um þessar stofnanir, þessa hornsteina íslenskrar menningar - já, ég leyfi mér að kalla Morgunblaðið bæði stofnun og hornstein íslenskrar menningar! - og mér sárnar alveg sérstaklega þegar þessir miðlar eða afleggjarar þeirra misstíga sig.

 

En, og þá vísa ég til þess sem fyrr var sagt:

 

Ef ummæli eru lítilsvirðandi en jafnframt ómakleg, þá hitta þau einungis þann fyrir sem hefur þau í frammi. Ef stóryrði mín eru ómakleg, þá eru þau einungis lítilsvirðandi fyrir mig sjálfan.

 

Jeg þakka þeim sem hlýddu. Góðar stundir!

 

Athugasemdir

[Heiða B. Heiðars, 9.5.2007 kl. 11:27]

Fyndið... en þegar þú segir það, þá er ég eiginlega sammála þér. Sjaldgæft

[Heiða B. Heiðars, 9.5.2007 kl. 11:29]

....vantaði þarna inn eitthvað sem ég sagði um hornsteina og krosstré annars vegar og RÚV og Moggan hins vegar!

Ertu til í að kvarta næst yfir því að maður nái ekki að klára að skrifa athugasemdir áður en þær rjúka af stað inn í kerfið!!

[Eiður Svanberg Guðnason, 9.5.2007 kl. 11:46]

Hjartanlega sammála þér. Það  eru gerðar meiri kröfur  til Morgunblaðsins og Ríkisútvarpsins en annarra fjölmiðla.  Á báðum stöðum ganga ambögusmiðir og bögubósar lausir, lesendum og  hlustendum  til angurs og armæðu.

Þetta er af mbl.is í gær:

Mbl.is 08.05.2007

Þetta er fólk frá Austur-Evrópu, karlmenn sem hafði stundað hljóðfæraflutning á almannafæri og gisti gjarnan í almenningsgörðum.

Frábært og til  fyrirmyndar , ekki satt ?

[Báran, 9.5.2007 kl. 13:01]

Heill og sæll.  Sérlega gaman að lesa hjá þér.  Kjarnyrtur penni á ferðinni.  Deili væntumþykju þinni í garð okkar ylhýra.   Er samt ekki alsaklaus af því að misþyrma tungumálinu.  En það er lágmark að þeir pennar sem sitja við jafnvoldugan miðil og MBL séu starfi sínu vaxnir.   Þó er ég umburðarlynd gagnvart málfars og stafsetningarvillum hjá tómstundapennum að öðru leyti enda ekki öllum gefið að skrifa rétt, t.d með tilliti til lesblindu.

[Sólrún Þórunn D Guðjónsdóttir, 9.5.2007 kl. 13:23]

Verd ad segja ad islenskan min hefur versnad mikid a seinustu 6 arum   En finnst ad bladamenn eiga nu ad geta skrifad goda islensku

[H (IP-tala skráð) 9.5.2007 kl. 20:39]

Mikið er nú gott að svona margir vita hvernig fjölmiðlar eiga að vera. Fréttavefir eru ritaðir af miklum hraða, það skýrir langmestan hluta þeirra villna sem þar birtast. Menn hafa ekki lesið fréttina yfir aftur, gleyma því eða þurftu að rjúka í annað. Annars skil ég aldrei af hverju Morgunblaðið og Rúv eiga að vera færari í íslensku, af hverju er ekki gerð sama krafa til annarra? Þeir eru líka fjölmiðlar.

[Eiður Svanberg Guðnason, 9.5.2007 kl. 20:53]

Að baki óskýrum texta er jafnan óskýr hugsun. Það tekur ekkert  lengri  tíma  að  skrifa  villulausa  frétt en  einhverja  ambögurunu.

 Málið er bara að kunna að skrifa   skýran og skiljanlega  texta á  góðu máli. Á það skortir nokkuð hjá mbl.is

[Ester Sveinbjarnardóttir, 9.5.2007 kl. 22:22]

Sá er vinur er til vamms segir Hlynur.

[Lilja Haralds (IP-tala skráð) 10.5.2007 kl. 01:11]

H, þar er það metnaðurinn sem kemur inn í dæmið.  Sumir geta skrifað jafnrétt þó þeir flýti sér en aðrir ekki og er það bara allt í lagi, en þá verður maður líka að sjá metnað sinn í að gefa sér tíma til að lesa skrif sín yfir áður en þau eru birt alþjóð.  Það er ekki verið að skrifa vini tölvupóst eða hripa niður innkaupalista; hér er um einn mest lesna vef landsins að ræða, vef blaðs sem hefur verið stolt af vönduðu málfari í tugi ára.  Þess vegna gerum við kröfur til miðilsins.