Vefur Ríkisútvarpsins - til hvers?

Ríkisútvarpið heldur úti vef. Allt gott um það - ef á honum mætti finna það sem helst ætti að vera þar: Skilmerkilegar upplýsingar um dagskrána. Núna fór ég inn á dagskrá Sjónvarpsins í dag. Þar getur meðal annars að líta eftirfarandi:

 

13.55 Íslandsmótið í handbolta

15.30 Alpasyrpa

15.55 Íslandsmótið í körfubolta

 

Ekki eru neinar frekari upplýsingar um þessa dagskrárliði. Ætli þetta séu yfirlitsþættir um mótin? Valdir kaflar úr leikjum ásamt spjalli spekinga? Beinar útsendingar frá leikjum? Og þá frá hvaða leikjum?

 

Hvers vegna í fjandanum er ekki hægt að segja nánar frá þessum dagskrárliðum, úr því að Ríkisútvarpið er á annað borð að halda úti vef? Ef þarna er um að ræða beinar útsendingar frá leikjum, þá finnst mér skipta máli hvaða lið eigast við. Suma leiki vildi ég gjarnan sjá, aðra alls ekki.

 

Nei, maður verður að gera svo vel að vera við tækið á tilsettum tíma og gá hvað kemur. Spila í happdrættinu.

 

Kemur sér líklega vel fyrir Sjónvarpið í áhorfskönnunum.

Athugasemdir

[Hlynur Þór Magnússon, 6.1.2007 kl. 15:57]

Því má bæta við, að eitt sinn kvartaði ég yfir því við einn af umsjónarmönnum Laufskálans á Rás eitt, að ekki skyldi koma fram hver væri gestur þar hverju sinni. Stundum kemur fyrir, að maður vildi gjarnan hlusta á einhvern sem þar er rætt við.

Umsjónarmaðurinn svaraði með þjósti: Ég sé ekki vandamálið - þú hlustar bara á þáttinn og þá heyrirðu hver gesturinn er!

Varla þarf að geta þess, að frá þeim tíma hef ég sniðgengið Laufskálann á Rás eitt gersamlega.