Skemmdarverk í mínu nafni ...

Stundum getur verið erfitt að verja góðan málstað*) þegar ofstækismenn segjast standa að honum líka, jafnvel eigna sér hann. Þetta gildir auðvitað ekki bara um náttúruvernd. Ég tel mig náttúruverndarsinna - og svo fréttist aftur og aftur af fólki sem einnig telur sig náttúruverndarsinna og hagar sér eins og fífl í nafni málstaðarins. Vegna hegðunar þessa fólks er minna mark tekið á mér! Það breytir engu í mínum huga þótt Frelsissamtök Jarðar hafi framið skemmdarverk á röngum vinnuvélum í eigu rangra aðila á röngum stað og röngum tíma - verknaðurinn er hinn sami, viljinn er hinn sami.

 

Það hefur oft komið fram, að ég er andvígur frekari stórvirkjunum hérlendis og andvígur endalausri álveravæðingu landsins. Það hefur komið fram, að ég er andvígur hvalveiðum Íslendinga - ekki vegna sérstakrar ástar á stórgáfuðum og fallegum dýrum, ekki vegna meiri ástar á hvölum en t.d. nautgripum og silfurskottum, heldur einfaldlega af praktískum ástæðum. Einmitt vegna þessara viðhorfa minna finnst mér slæmt þegar skemmdarvargar hafa sig í frammi í nafni náttúruverndar og hvalafriðunar - og þar með að vissu leyti í mínu nafni.

 

Ofstæki er fylgifiskur heimsku, eins og kunnugt er. Mörg dæmi þess hefur mátt sjá t.d. í athugasemdum hjá Katrínu Önnu Guðmundsdóttur og Sóleyju Tómasdóttur hér á Moggabloggi, svo og á knattspyrnuvefnum gras.is í tilefni af framboði Höllu Gunnarsdóttur til formennsku í KSÍ um daginn, eins og ég hef áður vikið að. Heldur einhver að það sé bara tilviljun, að þeir sem fara fram af mestu ofstæki skuli yfirleitt vera nánast óskrifandi?

 

Frétt á ruv.is (vill ekki talsmaðurinn Ólafur Páll Sigurðsson gefa sig fram?):

 

Í janúar birtist á vef EarthFirst yfirlýsing þess efnis að hópur sem kallar sig Earth Liberation Front, eða ELF, hefði skemmt þrjár vinnuvélar á vegum Alcan og skammstöfun ELF skilin eftir á vinnuskúr.

 

Í yfirlýsingunni kemur fram að verið sé að stækka verksmiðjuna út í verðmætt hraunlendi án samþykkis bæjarbúa í Hafnarfirði eins og búið hefði verið að lofa. Hópurinn stóð því í þeirri trú að framkvæmdir við stækkunina væru hafnar, en eins og fram kom í morgunfréttum var verið að vinna við skólphreinsistöð í Hafnarfirði. Þá er í lok yfirlýsingarinnar bent á heimasíðu Saving Iceland ef menn vilja frekari upplýsingar um hvernig verið sé að eyðileggja síðustu auðn Evrópu.

Fréttastofa hefur ekki náð í Ólaf Pál Sigurðsson talsmann Saving Iceland til að inna hann eftir tengslum samtakanna við EarthFirst, en framangreind yfirlýsing var einnig birt á heimasíðu Saving Iceland.

                  

                      

*) Það sem hver og einn telur góðan málstað; slíkt er einstaklingsbundið, eins og kunnugt er ...

Segjast hafa skemmt vinnuvélar í mótmælaskyni

Athugasemdir

[Halldór Egill Guðnason, 21.2.2007 kl. 14:26]

Það er með þessa ELF ofstækismenn líkt og svo marga aðra sem svipað haga sér, hvort heldur um er að ræða náttúruvernd, trúarbrögð eða annað. Með ofstopa, skemmdarverkum og annari mannfyrirlitningu tekst þessum skríl ávallt að skaða alla þá málstaði sem þeir telja sig vera að berjast fyrir og gera þannig raunverulega, eða "eðlilega" fylgismenn hinna ýmsu málefna, trúarbragða eða annars, að marklitlum eða jafnvel marklausum málsvörum, sem óhjákvæmilega verða ávallt setttir á stall með eða nálægt illvirkjunum. Svona vinnubrögð og fíflagangur á ekkert skilt við náttúruvernd eða að bjarga Íslandi, frekar en að sjálfsmorðssprengingar og önnur ódæðisverk séu samnefnari fyrir Islam.    

[Sigríður Jósefsdóttir, 21.2.2007 kl. 14:28]

Mér finnst nú að þegar mótmælendur eru farnir að vinna skemmdarverk í mótmælaskyni, þá eru mótmælin fallin um sjálft sig, og hætta á að ekki sé mikið mark tekið á viðkomandi.  En ég er nú kannski svo einkennilega innrætt, að mér var það kennt í æsku að trúa á það góða í manninum.  Svona aðfarir finnst mér eiginlega dæma sig sjálfar.  Kveðjur í Reykhólasveit,

[halkatla, 21.2.2007 kl. 20:20]

ef það á að skemma hús eðs tré sem einhverjir þurfa til þess að lifa, þá finnst mér ekkert að því að skemma vinnuvélar, en það sem gerðist í þessu tilfelli er heimska og ekkert annað - einmitt af því að þá tekur fólk minna magn á hófsömu skynsemisfólki sem veit hvað það er að segja! (btw þá er ég ekki á meðal hinna hófsömu einsog þið vitið, en ég þakka fyrir þá á hverjum degi því annars væri hér allt í stríði) - meiraðsegja fín róttæk mótmæli einsog á Kárahnjúkum í sumar verða fordæmd enn frekar útaf þessu.