Titringur á heimasíðu SnowGathering ...

[Uppfært] Breytingar hafa verið gerðar á vef hinnar umdeildu ráðstefnu 2007 SnowGathering, sem haldin verður hérlendis í næsta mánuði. Felld hefur verið brott undirsíða með titlinum Attendees, en þar voru myndir af þátttakendum ásamt tenglum í klámvefi þeirra. Meðal þeirra voru vestur-íslensku bræðurnir Hjorleifsson, en á forsíðunni á þeirra vef er tengill í annan vef sem helgaður er beinum og augljósum skírskotunum til barnagirndar. Líklega þykir slíkt ekki heppilegt á meðan ráðstefnan er undir smásjá hérlendis.

 

Í yfirlýsingu sem sett hefur verið inn á vef SnowGathering er lýst undrun á viðbrögðum við fréttum af fyrirhugaðri ráðstefnu. Framkvæmdastjóri ráðstefnunnar leggur á það áherslu, að allir sem sæki hana séu andvígir barnaklámi og mansali. Það eina sem hægt væri að gagnrýna dagskrá ráðstefnunnar fyrir sé heimsókn á nektarklúbb, en verði gerðar athugasemdir af því tagi yrði það að teljast hræsni á hæstu gráðu, þar sem u.þ.b. sex löglegir nektarklúbbar séu starfandi í miðborg Reykjavíkur ...

 

Nú held ég væri ráð, ekki síst  í ljósi nýlegra yfirlýsinga og samþykkta borgarstjóra og borgarstjórnar, að þetta síðasta verði tekið til athugunar - er miðbærinn morandi í nektarklúbbum? - jafnframt því sem áðurnefnd tilvísun á vef Vestur-Íslendinganna verði athuguð betur. Hún samræmist fremur illa því sem fram kemur í yfirlýsingunni á vef SnowGathering um viðhorf þátttakendanna til barnakláms ...

                        

Viðbót: Komin er ný tilkynning á vef SnowGathering-ráðstefnunnar, þar sem greint er frá því að henni hafi verið aflýst. Með fylgir mynd af grindhvaladrápi Íslendinga með eftirfarandi texta: Endangered whales slaughtered against their own will! - Hvölum í [útrýmingar]hættu slátrað gegn vilja sínum!  

               

Viðbót 2: Nú er mér bent á, að komin sé mynd af reyðarhval í vinnslustöð í staðinn fyrir myndina af grindhvalavöðu í fjöru. Textinn er hinn sami; hvalurinn hefur verið drepinn gegn vilja sínum.

Athugasemdir

[Ester Sveinbjarnardóttir, 22.2.2007 kl. 21:10]

Flott að þeir skuli ekki koma með þessa ráðstefnu hingað, við viljum ekki tengjast barnaklámi.

[Jón Steinar Ragnarsson, 23.2.2007 kl. 02:41]

FArið hefur máske fé betra en þetta fár yfir þessum blessuðu lopapeysutúristum er gengið út yfir allan þjófabálk.  Þvílíka hræsni, sjálfsupphafningu og sjálfsréttlætingu, hef ég bara ekki séð í seinni tíð.  Þetta er ekki í neinu samhengi við raunveruleikann og þessar samþykktir og aðgerðir stjórnvalda og Bændasamtakanna m.a. standast eingin lög né mannréttindasamþykktir.  Ég vona bara að klámspírurnar kæri þetta, því ég er handviss um að þau vinna málið.

Mér finnst ég búa í þjóð sem samsett er af hysteriskum idiotum, svei mér þá.