Játningar Khalíds Mohammeds og Geirfinnsmálið

Varla hefur Gísli Guðjónsson réttarsálfræðingur verið fenginn til að meta játningarnar sem streymt hafa frá Khalíd Sjeik Mohammed. Maður þessi hefur um árabil verið yfirheyrður í leynifangelsum Bandaríkjamanna og síðan í pyntingabúðunum í Guantanamo - án þess svo mikið sem hafa réttargæslumann. Og núna er hann búinn að játa alveg heil ósköp. Auðvitað! Og þótt fyrr hefði verið.

 

Hann er ábyrgur fyrir 9/11 - frá upphafi til enda. Hann er ábyrgur fyrir sprengingunni í World Trade Center. Hann er ábyrgur fyrir tilræði við Jóhannes Pál páfa. Hann skipulagði árás á Panamaskurðinn. Hann skipulagði árásir á Sears-turninn í Chicago, Library Tower í Los Angeles, Plaza Bank í Seattle og Empire State í New York. Hann er ábyrgur fyrir banatilræði við Musharraf forseta Pakistans. Hann er ábyrgur fyrir árásum á bandarísk kjarnorkuver. Hann er ábyrgur fyrir árásum á brýr í New York. Hann skipulagði árásir á bækistöðvar NATO í Belgíu. Hann skipulagði árásir í Ísrael, Tyrklandi og Tælandi. Hann skipulagði árásir á sendiráð Ísraels í Asíu og Ástralíu. Hann skipulagði árásir á bandarísk orrustuskip og olíuskip á heimshöfunum. Hann er ábyrgur fyrir áformuðu tilræði við Jimmy Carter Bandaríkjaforseta. Hann er ábyrgur fyrir áformuðu tilræði við Bill Clinton. Hann skipulagði árásir á Canary Wharf, Big Ben og Heathrow-flugvöll í Lundúnum. Hann skipulagði árásir á Kauphöllina í New York og fleiri fjármálastofnanir. Hann er ábyrgur fyrir skósprengjumanninum Richard Reid. Hann er ábyrgur fyrir sprengjutilræðunum í næturklúbbunum á Balí. Hann er ábyrgur fyrir tilræði við ferðamenn og ísraelska flugvél í Kenía. Hann hjó höfuðið af Daniel Pearl með eigin hendi. Og svo framvegis. Bara nefna það.

 

Allt þetta hefur maðurinn játað - eftir nokkurra ára einangrun og pyndingar á vegum Bandaríkjastjórnar. Er yfirleitt nokkuð fleira að játa?

 

Hvað með hvarf Geirfinns Einarssonar? Munar þennan ágæta mann nokkuð um að játa líka á sig morðið á Geirfinni og leysa þannig málið?

 

Þegar játningaregistur Khalíds þessa er lesið verður einhverjum hugsað til játningaflaumsins sem streymdi frá sakborningum í Guðmundar- og Geirfinnsmálum á sínum tíma. Þar reyndist óhjákvæmilegt að strika út játningar á fjölda glæpa - framinna sem óframinna - svo að ákærur og dómar gætu orðið með þeim hætti að trúverðugt og sennilegt gæti talist.

 

Sennilegt út í frá, á ég við. Aftur á móti fráleitt í huga þeirra sem til þekktu, þeirra sem tóku þátt í yfirheyrslunum og skráðu niður játningarnar.

 

Ég var þar á meðal.

                  

      

Sjá m.a.: Der Spiegel / spiegel.de „Ich war verantvortlich von A bis Z“

 

Athugasemdir

[Ásthildur Cesil Þórðardóttir, 16.3.2007 kl. 01:54]

Þessar "játningar" eru enn einn myllusteinni um háls Bandaríkanna, hver trúir þessum játningum, ég vil gjarnan sjá þann asna sem segist í raun og veru trúa að þessar játningar séu í raun og veru sannar Komnar fram með pyndingum, án lögmanns, án allrar aðkomu neinna aðila, sem gætu hugsanlega komið manninum til varnar.  Ég segi bara fari þessir bandaríkja menn norður og niður, þeir eru ekkert betri en verstu einræðisseggir veraldarinnar.  Þeir eru búnir að stimpla sig inn með Hitler og öllum hinum einræðisherrum þessarar jarðar með óyggjandi hætti.  Halelúlja BNA þið hafið áorkað með dyggri þátttöku Gogga Búsks að stimpla ykkur inn með öllum morðhundum og einræðisherrum aldarinnar.

[Snorri Hansson, 16.3.2007 kl. 03:49]

Já þessar játningar eru Bandaríkjastjórn til reginar skammar eins svo margt þessa dagana og samjöfnuðurinn við Guðmundar og Geirfinnsmál er réttur. Það mál hangir eins og mara á dómskerfi okkar og þjóðarsálinni

[Georg P Sveinbjörnsson, 16.3.2007 kl. 07:49]

Hef samt heyrt ótrúlega marga segja að maðurinn sé öruglega meira og minna sekur um þetta allt,en þó að maðurinn sé enginn kórdrengur hlýtur  allt hugsandi fólk að átta sig á því að játningar dregnar fram með pyntingum eru nákvæmlega einskis virði og skekkja alla myndina.

[Haukur Nikulásson, 16.3.2007 kl. 08:21]

Ofsóknaræði sumra stjórnmálamanna er jarðvegur fyrir mennskan óþverra sem þrífst í skjólinu og fær útrás fyrir sjúklega mannlega fyrirlitningu. Vonandi verður einhver breyting á þessu þarna fyrir vestan við næstu forsetakosningar.

[Heiða B. Heiðars, 16.3.2007 kl. 19:12]

Markaðsátak bandaríkjastjórnar hefur heppnast nógu vel til að það er fullt af fólki sem trúir því að þessar játningar séu raunverulegar.

[Þorsteinn Sverrisson, 16.3.2007 kl. 22:41]

Góður.......

[Salvör Kristjana Gissurardóttir, 16.3.2007 kl. 23:06]

Hann er saklaus af Geirfinnshvarfinu... hann var bara 10 ára. Annars bloggaði ég um þetta. Skil því miður ekki þýsku greinina sem þú vísar í. En með pyntingum er hægt að fá fram margs konar játningar. Mér finnst ekkert sem ég hef lesið um þennan mann benda til að hann  sé svo góður skipuleggjandi að hann hafi getað skipulagt þetta allt sem honum er gefið að sök. En ég hef kannski ekki lesið rétta stöffið.

[Jón Steinar Ragnarsson, 17.3.2007 kl. 17:57]

Þetta er sama og Eichman og Höss gerðu í sínum játningum um Gyðingadrápin. Höss undir pintingum, sem upplýst hefur verið og Eichman af djúpri fyrirlitningu á dómstólnum og þeirri staðreynd að hann yrði dæmdur til dauða, sama hvað.   Þetta er því miður víða í okkar sögu og því erfitt að skrá hana eftir niðurstöðum dóma. Svo eru menn settir í fangelsi enn þann dag í dag fyrir að véfengja þessar niðurstöður og vilja endurskoða hlutina.  Væri allavega ekki vinsælt í USA að bíta í kinn yfir þessu.  Þar ert þú á móti þjóðinni í heild og með terroristum ef þú efast, samkvæmt heimspeki hins talandi runna. ((Burning Bush)

[Agný, 18.3.2007 kl. 04:29]

Ég held að bandarísk stjórnvöld séu með þessari yfirlýsingu að reyna að réttlæta pyntingar undir formerkinu "hryðjuverk"..´Hvað með FANGAFLUGIР sem bandarísk stjórnvöld sögðu að hefði aldrei átt sér stað.   http://agny.blog.is/blog/agny/entry/103617Líka að  fá heimsbyggðina til að kaupa það að það hafi verið 19 arabar sem staði að baki 9/11. Það þyrfti að borga mér feita fúlgu til að ég kaupi það...Svo er Bush og co að plana næsta plott..innrás í Iran...Ætli þeir muni varpa "mini" atombombu á sína eigin þjóð og ásaka írana um það?Svona til að réttlæta það  og hafa ástæðu til að ráðast inn í Iran...Kanski ljótt að segja/skrifa svona en maður er farinn að trúa öllu upp á þetta klan lið...

[Ingvar Þór Jóhannesson, 18.3.2007 kl. 05:30]

Hvað kemur Ron Jeremy fréttinni við?