Upprifjun á innrásarafmæli - Saddam, Davíð og Halldór eru allir farnir frá

Á fjögurra ára afmæli innrásar Bandaríkjamanna og hinna viljugu þjóða í Írak er ekki úr vegi að rifja upp orð Sæunnar Stefánsdóttur alþm. og ritara Framsóknarflokksins um afleiðingarnar fyrir Davíð Oddsson og Halldór Ásgrímsson. Að mati hennar hrökkluðust þeir báðir frá völdum vegna þessa máls. Annar var gerður að blaðafulltrúa Seðlabankans, hinum var troðið í samnorrænt embætti.

 

Í þingræðu 1. mars síðastliðinn, þar sem hlutdeild þeirra Davíðs og Halldórs f.h. íslensku þjóðarinnar í innrásinni í Írak var til umræðu, sagði Sæunn Stefánsdóttir - og sjálfur ritari Framsóknarflokksins ætti að vita þetta flestum öðrum betur:

                                            

Við framsóknarmenn höfum viðurkennt og tekið fyrir í okkar röðum að um ranga ákvörðun hafi verið að ræða og að ákvörðunin hafi verið mistök. - - - Sömuleiðis hefur þetta mál haft áhrif á stjórnmálaferil þeirra aðila sem komu að ákvörðuninni í upphafi. Því verður ekki neitað, það liggur alveg fyrir. Bæði Davíð Oddsson, þáverandi forsætisráðherra, og Halldór Ásgrímsson, þáverandi utanríkisráðherra, eru hættir þátttöku í stjórnmálum. Ég tel að það hafi m.a. verið vegna þessa máls, ég held það. Og ég held að að einhverju leyti fylgi þetta mál þeim og þeirra stjórnmálaferli ...

                  

                                               

Einnig til upprifjunar fylgir hér frétt Ríkisútvarpsins 10. apríl 2004, þegar Íslendingar voru á hátindi frægðar sinnar í Írak - Saddam var oltinn úr sessi en Davíð og Halldór sátu enn:

                                        

                               

Íslendingar finna sinnepsgas í Írak

                             

Jónas Þorvaldsson og Adrian King sprengjusérfræðingar Landhelgisgæslunnar á vegum Íslensku friðargæslunnar í Írak hafa fundið sprengjukúlur skammt frá Basra í Suður-Írak sem innihalda eiturgas. Þetta eru fyrstu gjöreyðingarvopnin sem finnast í Írak. Halldór Ásgrímsson utanríkisráðherra segir þetta mikið afrek hjá íslensku sprengjuleitarmönnunum og staðfestingu á mikilvægi Íslendinga í alþjóðlegu starfi.

                                    

Gjöreyðingarvopn, kjarnavopn, sýkla- og efnavopn Íraka voru meginástæða sem Bandaríkjamenn gáfu fyrir innrásinni í Írak. Engin efnavopn hafa fundist þrátt fyrir gríðarlega leit fyrr en þá nú að Íslendingar finna vopnin.

                                     

Írakar beittu efnavopnum nær daglega í 8 ára löngu stríði gegn Íran 1980-1988. Þá voru Írakar bandamenn Bandaríkjanna. Bandaríkjamenn veittu Írökum leyniþjónustuupplýsingar fyrir sókn á Faw-skaga 1988 þar sem sinnepsgasi og öðrum efnavopnum var beitt í stórum stíl.

                                   

Írakar hafa sagst og sárt við lagt að vera búnir að eyða öllum slíkum vopnum en efnavopnin sem fundust við Basra eru fyrstu dæmin sem sýna annað.

                

                                         

Eldra blogg - morguninn þegar Saddam Hussein var hengdur:

30.12.2006  Drjúg urðu okkur Bush morgunverkin

 

Athugasemdir

[Ester Sveinbjarnardóttir, 20.3.2007 kl. 11:27]

Þetta stríð er bara slæmt og hefði aldrei átt að hefjast, íslendingum til minnkunar.

[Jónína Sólborg Þórisdóttir, 20.3.2007 kl. 12:22]

Ég gleymi því aldrei þegar ég sat við sjónvarpið þessa nótt og beið eftir fyrstu sprengjunum á Bagdad. Mér var skítkalt inn að beini og fannst þetta vera byrjunin á heimsendi.

[Katrín, 20.3.2007 kl. 12:54]

Gott að einhverr haldi utan um fréttaflutning frá þessum tima.  Ótrúlegt að lesa að það voru Íslendinga em fundur gereyðinagrvopnin sem reyndust vera nokkra sprengikúlur.  Hvað skyldu þær hafa verið margar?  Það þarf ekki nema tvær til að geta skrifað í fleirtölu.  Og skyldi þetta vera staðfestur fundur?  Ísland, best í heimi

[Haukur Nikulásson, 20.3.2007 kl. 14:28]

Ef ég man rétt taldi Halldór Ásgrímsson sprengjufund íslendinganna "heimssögulega frétt". Þegar hið sanna kom í ljós fékk maður bara bjánahroll.

Dómgreindarbrestur þeirra Halldórs og Davíðs var algjör í þessu máli og litlu minni en Bush. Þeim þótti öllum sjálfsagt að í Írak væru gjöreyðingarvopn. Þau voru aðalástæða innrásarinnar ekki grimmd Saddams Hussein. 

[Pétur Guðmundur Ingimarsson (IP-tala skráð) 20.3.2007 kl. 22:58]

Það jákvæða er þó að Írakar eru nú frjálsir og það er hagvöxtur í landinu ef hægt er að treysta fréttaflutningi.

[Ólafur Þórðarson, 21.3.2007 kl. 03:07]

Fréttamiðlarnir eru það sem brugðust trú minni algerlega. Út úr þessu stóð að BBC (fyrir Hutton skýrsluna), Guardian og örfá önnur blöð stóðu sig í fréttamennskunni. Hitt meira og minna feilaði illilega. Fréttum er augljóslega stjórnað að ofan í svona málum og Amerísku miðlarnir lugu okkur uppfull. Til dæmis fór ég í mótmælin í New York 15. Febrúar 2003. Fjölmiðlar drógu úr vilja fólks til að fara með því að vara við mótmælendum sem væru með ofbeldishneigð osfrv. Stíjuð voru af svæði fyrir eitthvað 100,000 manns eða hvað það átti að vera í þar til gerðum afgirtum svæðum. Fór þarna og það var svo mikið af fólki sem komst ekki inn og þvagan allavega fimmfalt það sem var gert ráð fyrir að flæddi yfir hálfa Manhattan. Hef aldrei séð slíkann mannfjölda.

New York Times sagði 75,000 manns hafa sótt mótmælin. Hugsið ykkur svo hvers vegna engin mótmæli eru innan USA miðað við Víetnam? Vegna þess að alvöru rannsóknarblaðamenn eru sjaldséðari en hvítir hrafnar og fréttamiðlar ljúga og skálda eftir hentugleika eigenda sinna, stríðsbröskurum og Las Vegas bröskurum.