Ómerkilegasta fréttin mín

Líklega eru fjögur-fimm ár síðan ég skrifaði þá ómerkilegustu frétt sem ég hef skrifað um dagana - og er þá nokkuð sagt. Mér varð hugsað til hennar þegar ég skrifaði næstu færslu hér á undan. Á þessum tíma gekk ég frá tíu til fimmtán fréttum á dag að jafnaði og stundum meira inn á vef Bæjarins besta á Ísafirði - bb.is. Þá eins og nú voru stöku fréttir þaðan teknar inn á aðra fréttavefi, svo sem vefina mbl.is, visir.is og einhvern vef fyrir austan, sem um tíma flutti samansafn frétta af landsbyggðinni.

 

Dálítið fannst mér það pirrandi, frómt frá sagt, að oftast var þar lítt eða ekki hirt um jákvæðar fréttir, jafnvel stórfréttir af atvinnulífi eða menningarlífi eða mannlífi yfirleitt, en umsvifalaust tínt upp það neikvæða, alveg sama hversu lítið eða ómerkilegt sem það var. Ef einn daginn voru t.d. fluttar fréttir af breytingu gamla sjúkrahússins á Ísafirði í safnahús, ákvörðun um nýjan gervigrasvöll, heimsmeistaramótinu í víkingaskák, nýrri Breiðafjarðarferju og þjófnaði á hjólkoppum, þá var eingöngu sú síðasta tekin á aðra vefi til fróðleiks fyrir landslýð allan um lífið fyrir vestan.

 

Núnú, í áðurnefndum pirringi skrifaði ég frétt á bb-vefinn þess efnis, að ónýtur ísskápur hefði dottið af pallbíl á Ísafirði og skrámað hurðina á öðrum bíl. Ekki man ég af hvaða tegund ísskápurinn var né heldur bílarnir sem hlut áttu að máli, en slíkar upplýsingar má auðvitað helst ekki vanta í fréttir af þessu tagi. Jafnframt spáði ég því að þessi frétt yrði umsvifalaust tekin upp á helstu fréttavefi landsins. Ég var sannspár: Allir helstu fréttavefir landsins tóku hana upp - og enga aðra af bb-vefnum þann daginn.

 

Við þessu er auðvitað ekkert að segja!

 

Athugasemdir

[Sigfús Sigurþórsson., 8.4.2007 kl. 19:40]

Hahaha, þetta er stórskemmtileg færsla, og tek ég heilshugar undir að oft eru fréttir afar ómerkilegar og eiga einganveginn heima á frétta stað.

[Sigfús Sigurþórsson., 8.4.2007 kl. 19:42]

Gleymdi aðal atriðinu, ég óska þér og þínum Gleðilegra Páska.

[Halldór Sigurðsson, 9.4.2007 kl. 01:10]

Ljótar fréttir selja betur , ekki satt ?
 

[Halldór Egill Guðnason, 11.4.2007 kl. 02:24]

Þetta með ísskápinn er ekkert annað en bara "brilliant". Væri alveg til í að heyra af frystikistum eða örbylgjuofnum í svipuðum uppákomum. Nokkuð viss um að ég myndi sperra eyrun betur við svona frétt, en svo og svo marga látna, skotna, svelta eða sprengda úti í heimi. Ekki það að það séu ekki fréttir, heldur hitt að fallandi ísskápar á trukki fyrir vestan mættu mjög gjarnan fá að fljóta með í umfjölluninni, svona rétt til þess að halda í vonina á mannkynið. Sennilega verður þín versta frétt ekki svo slæm, er upp verður staðið.