Evróvisjón vatn á myllu VG

Mér finnst gaman að fylgjast með kosningabaráttunni. Helst að ég vildi fá meira af skoðanakönnunum. Stundum líða margir klukkutímar á milli. Það er alveg ótækt.

 

Auglýsingar og áróðursbrögð flokkanna eru eitt skemmtiefnið. Geir Haarde skuggalaus í glaðasólskini eins og Sæmundur fróði eftir samskiptin við kölska. Græni framsóknarkallinn fer afturábak og stoppar. Glitnir gerir rauða Samfylkingarpunktinn að sínum. Allt að tveggja ára fangelsis krafist yfir Ómari Ragnarssyni fyrir störf gegn íslenskri náttúru. Auglýsingastofa Frjálslynda flokksins setur glæsilegt Íslandsmet í stafsetningarvillum.

               

Þannig mætti lengi telja.

           

Og svo er það Evróvisjón.

          

Margir eru gramir, reiðir og sárir vegna úrslitanna í undankeppni Evróvisjón í gærkvöldi. Þeir sem af einhverjum ástæðum eru gramir, reiðir og sárir eru líklegri til að kjósa stjórnarandstöðuna hverju sinni. Þeir sem eru gramir, reiðir og sárir eru líklegir til að kjósa Vinstri græna, vegna þess að sækjast sér um líkir. Snúum sókn í vörn!

             

Og svo er það veðrið.

             

Gott veður á kjördag veit á gott hjá sitjandi stjórnarflokkum hverju sinni. Sólskin og fuglasöngur létta lundina. Hvergi skuggi, a.m.k. ekki þar sem forsætisráðherrann er. Fólk er ánægðara og jákvæðara en ella. Og tengir þetta ósjálfrátt við ríkisstjórnina. Einföld ómeðvituð tengsl. Eins og milli rauðu Glitnispunktanna og Samfylkingarpunktanna. Þeir sem vilja áfram gott veður og ekkert stopp kjósa Geir Haarde eða Þorgerði Katrínu eða Árnasettið. Jafnvel skattleysismörkin og kjör þeirra sem minnst mega sín gleymast í sólskininu.

 

En ef það springur á leiðinni á kjörstað eða löggan sektar mann, þá dregur ský fyrir sólu í sálinni og stjórnarandstaðan fitnar.

 

Gleðilegar kosningar!

 

Athugasemdir

[Lilja Haralds (IP-tala skráð) 11.5.2007 kl. 14:05]

Ég er HRÆÐILEGA súr yfir úrslitunum í gær, en frekar myndi ég plokka af mér táneglurnar með ryðgaðri hrífu en kjósa til vinstri.

*sniff* 

[Pétur Tryggvi (IP-tala skráð) 11.5.2007 kl. 14:06]

Kannski þarf vont veður til að við stöldrum við, opnum augun og náum áttum. Þá getur vont veður verið gott.

[Sigfús Þ. Sigmundsson, 11.5.2007 kl. 14:18]

Takið endilega þátt í æsispennandi kosningagetraun:

http://sigfus.blog.is/blog/sigfus/entry/207012/

[Báran, 11.5.2007 kl. 17:16]

Ekki verða nú úrslitin í Evró til þess að ég drekki mér í þunglyndi þó súr séu! Alltént verða þau ekki til þess að ég fari svo langt til vinstri  Tel mig meira að segja hægra megin við miðjuna óskilgreindu, þannig að kannski er kjörið að óska eftir því að það skiptist á skin og skúrir á morgun    

[Lilja Haralds (IP-tala skráð) 12.5.2007 kl. 04:03]

  Ég held það séu litlar líkur á að ég þurfi að finna mér ryðgaða hrífu (hvað var ég að hugsa í morgun??) því Siggi stormur spáði svo góðu veðri og það er vísindalega sannað að fólk styður frekar sitjandi ríkisstjórn þegar veður er gott 

[Hlynur Þór Magnússon, 12.5.2007 kl. 04:31]

Lilja - nútíminn brúkar ekki hrífur nema e.t.v. gamlir framsóknarmenn á flötinni við elliheimilið. Nútíminn rekur tærnar undir garðsláttuvélina og fjarlægir ekki bara neglurnar á tánum ...

[Lilja Haralds (IP-tala skráð) 12.5.2007 kl. 12:58]

Halló, hefurðu aldrei heyrt um Árbæjarsafnið?

Geez....