Engir bananar frá Íslandi

Rakst á þetta í Morgunblaðinu fyrir sextíu árum:

 

Nokkur bresk blöð hafa undanfarið birt rosafregnir um að nú væri hægt að fá nóg af banönum frá Íslandi. Merkt blað eins og Yorkshire Post skrifar alllanga grein um málið og skýrir út hvernig á því standi, að Íslendingar geti framleitt þennan lostæta ávöxt. Það er vitanlega hverahitinn, sem veldur því.

                  

Auðsjeð er á öllu, að einhver sem hjer hefir verið hefir hlaupið með þessa bananasögu. En hætt er við, að það verði að bíða enn um stund, að Bretar fái að kitla bragðlauka sína með íslenskum banönum.

                     

(5. júlí 1947)

 

Athugasemdir

[Heiðar Birnir, 27.5.2007 kl. 19:54]

Það hefur verið nóg að gera hjá þér fyrir 60 árum!  Og manst þetta ennþá.  Gott hjá þér góði!

[Hlynur Þór Magnússon, 27.5.2007 kl. 20:16]

Ég er soldið eftirá í blaðalestrinum ...

Bestu kveðjur, Heiðar!

[Ingólfur Kjartansson, 27.5.2007 kl. 23:11]

Já sæll Hlynur, eða kannski er minna að gera hjá þér núna en fyrir 60 árum. Skilst að það sé ekki rífandi gangur í tilhugalífi kattardýra á Reykhólum núna, enda helv kuldi, eins og gjarnan er á þessum tíma árs.  Þetta er samt þörf ábending, fyrir einhverja!!

Bestu kv. frá Tálkna

[Ingólfur Kjartansson, 27.5.2007 kl. 23:14]

Bendi á vefslóðina http://www.snjafjallasetur.is/ sem er bara ekert nema fróðleikur frá því jafnvel löngu fyrir 1940.

Kv

IK

[Kristín M. Jóhannsdóttir, 28.5.2007 kl. 00:32]

Þessi trú er enn við lýði í dag. Einhvern tímann í fyrra hitti ég strák sem sagði mér að Ísland væri meðal þeirra landa sem flyttu út flesta banana. Ég vildi nú ekki kannast við þetta en hann gaf sig ekki. Sagðist vera nýbúinn að lesa þetta. Ég röflaði eitthvað um gúrkur og tómata en fékk hann ekki ofan af þessu með bananana.

[Sigurður Viktor Úlfarsson, 28.5.2007 kl. 02:03]

Í gróðurhúsi Landbúnaðarháskólans í Hveragerði er að finna forláta bananatré sem ku vera það eina á landinu.  Einhvern tímann heyrði ég einnig að bananar væru ekki framleiddir í öðrum löndum Evrópu.  Á sama stað heyrði ég að þetta bananatré í Hveragerðinni gerði því Íslendinga að mestu bananaframleiðsluþjóð í Evrópu...og hana nú!  Ísland - Bezt í heimi!!!

[Blekpenni (IP-tala skráð) 28.5.2007 kl. 03:20]

Lengi lifi bjúgaldinlýðveldið!