Framkvæmdastjóri þingflokks Samfylkingarinnar afskrifar olíuhreinsunarstöð á Vestfjörðum

Dofri Hermannsson, sem er varaborgarfulltrúi í Reykjavík og „starfandi framkvæmdastjóri þingflokks Samfylkingarinnar“ eftir því sem fram kemur í kynningu á bloggsíðu hans, skrifar í yfirlætis- og fyrirlitningartón um þá athugun sem nú fer fram á því að reisa olíuhreinsunarstöð á Vestfjörðum. Fyrirsögnin hjá honum er Að "windowsjoppa" olíuhreinsunarstöð. Þar fjallar hann m.a. um ferð „sérlegrar“ sendinefndar „stóriðjumangara“ og fleiri til meginlandsins til að kynna sér slíkar stöðvar. Ef reynt er að skilja hvað maðurinn er að fara verður ekki annað séð en hann sé - og þá væntanlega fyrir hönd þingflokks Samfylkingarinnar sem hann er „starfandi“ framkvæmdastjóri fyrir eins og hann tekur fram - þegar búinn að afskrifa eins kjánalegt og fyrirlitlegt fyrirbæri og olíuhreinsunarstöð á Vestfjörðum.

                     

Hafa má í huga, að meðal þeirra sem sitja í þingflokknum sem Dofri Hermannsson stjórnar er Össur Skarphéðinsson iðnaðarráðherra.

              

Óþarfi er að endursegja hér frekar ummæli framkvæmdastjórans. Best er að sem flestir lesi þau beint, einkum þeir sem málið snertir helst.

                     

Vegna þessara afdráttarlausu ummæla „starfandi framkvæmdastjóra þingflokks Samfylkingarinnar“ má hins vegar benda á og vitna í ummæli Sigurðar Péturssonar, oddvita Samfylkingarinnar í Ísafjarðarbæ og flokksbróður framkvæmdastjórans, sem var einn þeirra sem fóru umrædda kynnisferð. Haft er eftir Sigurði á fréttavefnum bb.is, „að skoðunarferð sveitarstjórnarmanna Vesturbyggðar og Ísafjarðarbæjar hafi verið afar fróðleg og gagnleg“. Að hans sögn er hér um hátækniiðnað að ræða. „Í svona stöð vinnur fjöldi tæknimanna og verkfræðinga og ef til þess kemur að olíuhreinsistöð verði reist er um að ræða nýtt stig í tækniþróun á Íslandi“, segir Sigurður. Það er mat hans að ferðin geri bæjarfulltrúum auðveldara fyrir að mynda sér sjálfstæða skoðun á málinu. „Við fengum beinan aðgang að fólki, bæði í Þýskalandi og Hollandi, sem hefur með þetta að gera og gátum spurt þau beint þeirra spurninga sem brunnu á okkur.“

                

Ekki verður séð mikil samsvörun með hófsamlegum orðum Sigurðar Péturssonar og drýldnislegum stílæfingum framkvæmdastjóra þingflokksins um þetta mál, þó að þeir séu flokksbræður.

                 

Vestfirðingar ættu endilega að kynna sér nánar viðhorf og málflutning „starfandi framkvæmdastjóra þingflokks Samfylkingarinnar“ - og þá jafnframt, skyldi maður ætla, afstöðu Samfylkingarinnar og iðnaðarráðherra til þess sem Vestfirðingar eru að bauka um þessar mundir. Ekki verður betur séð en bæjarfulltrúarnir úr Ísafjarðarbæ og Vesturbyggð hefðu getað sparað sér kynnisferðina. Starfandi framkvæmdastjóri þingflokks Samfylkingarinnar veit allt um málið. Og væri naumast að skrifa um það á svona afdráttarlausan hátt án samráðs við iðnaðarráðherra og raunar ríkisstjórnina alla.

                        

En það kemur væntanlega í ljós.

 

Athugasemdir

[Halldór Egill Guðnason, 12.7.2007 kl. 00:41]

Dofri og co hljóta að luma á lausn allra mála fyrir Vestfirði. Svona digurbarkalega talar fáir, nema hafa eitthvað betra til málanna að leggja. 

[Þorleifur Ágústsson, 12.7.2007 kl. 00:56]

Auðvitað mega menn og geta haft skoðanir. En það er náttúrlega fullkomlega óábyrgt að vera með yfirlýsingar að óskoðuðu máli - Dofri og aðrir sem tjá sig um mál og eru með fullyrðingar um niðurtöðu áður en eins grunnupplýsingar liggja fyrir eiga ekkert erindi í pólítík - það er ljóst. Það sem skiptir máli er að landið sé byggilegt og að þeir sem það byggja geri það í sátt við umhverfið. Olíuhreinsistöð er bara eitt af mörgu sem ég ætla að vona að verði skoðað af alvöru - af til þess bærum aðilum og allt verði uppi á borðinu með það. Fyrr en nákvæmar upplýsingar liggja fyrir er ógerningur að vera með fullyrðingar. En öllum ber að hafa skoðun á málinu.

[Halldór Egill Guðnason, 12.7.2007 kl. 01:03]

KLUKK! Hef ekki hugmynd um hvað er í gangi, en allir að "Klukka"

[Bragi Þór Thoroddsen, 13.7.2007 kl. 10:49]

ÉG var ekki lengi að verða ósammála mínum ágæta Dofra í þessu.  Það er alltaf ástæða til að skoða þessa hluti áður en farið er með offorsi gegn "könnun" á mögulegri starfsemi slíkrar faktoríu.  Held að almennt séu menn að tapa sér í þessari náttúruverndarbylgju.  Við erum barasta ekki gerð þannig af guði öll að við getum farið á fjóra og bitið gras.

vcd