Sigurlín Margrét - varaþingmaður í gíslingu

Ekki er eins mikið veður gert út af liðhlaupi Valdimars Leós Friðrikssonar úr þingflokki Samfylkingarinnar yfir í þingflokk Frjálslyndra eins og þegar Gunnar Örlygsson hljópst úr þingflokki Frjálslyndra yfir í þingflokk Sjálfstæðisflokksins. Kannski má svo illu venjast að gott þyki. Enda þótt hver þingmaður eigi í orði kveðnu ekki að fara eftir öðru en sannfæringu sinni, þá er svo alls ekki í raun, eins og kosningafyrirkomulagið er. Þingmenn (og varamenn þeirra) eru á þingi í umboði þeirra flokka sem bjóða þá fram - það eru ekki bara þeir sjálfir sem bjóða sig fram.

 

Sigurlín Margrét Sigurðardóttir, varamaður Gunnars Örlygssonar, er og hefur verið í undarlegri stöðu, einmitt vegna þess hvernig kosningafyrirkomulagið er. Hugsið ykkur ef hún tæki nú sæti á þingi um lengri eða skemmri tíma í forföllum Gunnars - sem hún hefur reyndar ekki fengið að gera, af nokkuð skiljanlegum ástæðum.

                  

Liðhlaup af þessu tagi er - endurtek: vegna þess hvernig kosningafyrirkomulagið er - svívirðilegt siðleysi, alveg sama hvaða þingmenn eða hvaða flokkar eiga í hlut. Ekki bara hjá þeim mönnum sem það stunda, heldur einnig hjá þeim flokkum sem taka þeim fagnandi. Hegðun af þessu tagi kom að vísu ekki á óvart þegar Gunnar Örlygsson átti í hlut. Hins vegar þekkti ég ekkert til þessa Valdimars. Ég geri það núna.

 

Gunnar Örlygsson er ekki eini liðhlaupinn sem hefur sett strik í reikning Sigurlínar Margrétar Sigurðardóttur varaþingmanns - og kjósendanna! Valdimar Leó Friðriksson gerir það líka. Nú er ætlunin að þessi nýi liðsmaður, þessi happafengur, sem á vef Alþingis er nú þegar skráður sem þingmaður Frjálslynda flokksins, skipi efsta sætið á lista flokksins í Suðvesturkjördæmi. Sigurlín Margrét sækist eftir því sæti líka - en hún á við fötlun að stríða, heyrnarleysi, og vegna þeirrar fötlunar er henni sagt að best sé að hún verði áfram varaþingmaður. Hún hefur reynsluna ...

 

Og svo er hún auðvitað kona.

 

Sigurlín Margrét skrifar athyglisverðan pistil um þessi mál á bloggsíðu sinni í dag.

                    

Viðbót - mér finnst það svo augljóst að mér láðist að taka það fram: Ef þingmaður telur sig, af einhverjum ástæðum, ekki lengur eiga samleið með þeim flokki, sem valdi hann á framboðslista sinn, - með einhverri af mismunandi aðferðum sem notaðar eru - þá á hann auðvitað að láta af þingmennsku og rýma fyrir varamanni sínum. Með liðhlaupi í annan þingflokk er þingmaður að svíkja bæði flokkinn sem valdi hann sem fulltrúa sinn á þingi og kjósendurna sem kusu lista flokksins.

Athugasemdir

[Heiða B. Heiðars, 23.1.2007 kl. 11:09]

Ömurlegt! Gunnar Örlygsson vs Sigurlín Margrét... ekki spurning í mínum huga. En þessi Valdimar... ekki eins viss. Varla að maður hafi heyrt á hann minnst fyrr en hann tilkynnti brotthvarf sitt. Maður stóð eins og bjáni með stórt spurningamerki.. Valdimar WHO?? 

[Guðrún María Óskarsdóttir., 24.1.2007 kl. 02:40]

Sæl Sigurlín Margrét.

Þetta sem hér kemur fram varðandi það atriði að Valdimar Leó skipi fyrsta sæti í Suðvesturkjördæmi er eitthvað sem er fullyrðing út í loft því eins og þú veist þá hefur enn ekki verið skipað á lista og verður ekki gert fyrr en eftir Landsþing og næsta mál á dagskrá okkar í stjórn kjördæmafélagsins er fundur með þér, um þau mál.

Því miður Sigurlín Margrét sýnist mér hér vera einhver að tala fyrir þig ?

Með fullyrðingum sem ekki standast og fleiri en ég geta staðfest.

kveðja.

formaður stjórnar kjördæmafélags Suðvestur.