Skemmtileg útskriftarferð til Kaliforníu - hver borgar brúsann?

Fréttin um ferð sendinefndar Alþingis til Kaliforníu vekur ýmsar spurningar. Frétt mbl.is er byggð á tilkynningu á vef Alþingis.

 

Á báðum stöðum koma sömu efnisatriðin fram.

 

Á báðum stöðum koma sömu efnisatriðin ekki fram.

 

Orðalagið í tilkynningunni frá Alþingi vekur í vissum tilvikum sérstaka athygli:

                                      

Sólveig Pétursdóttir, forseti Alþingis, og eiginmaður hennar, Kristinn Björnsson, munu heimsækja Kaliforníu ...          

                            

Með þeim í för verða þingmennirnir Sigríður Anna Þórðardóttir, Margrét Frímannsdóttir og Hjálmar Árnason, auk Helga Bernódussonar, skrifstofustjóra Alþingis, og Belindu Theriault, forstöðumanns alþjóðamála.         

                           

Sendinefndin mun koma við í Los Angeles, Santa Monica, Monterey og San Francisco, auk höfuðborgarinnar Sacramento.        

                         

Sumsé: Það eru forseti Alþingis og maki sem fara í heimsóknina. Fimm manns í viðbót verða með þeim í för. Hópurinn í heild kallast sendinefnd.

 

Í tilkynningunni kemur fram hvað sendinefndin aðhefst þá viku sem heimsóknin í Kaliforníu stendur:

                                  

Rætt verður við forseta efri og neðri deildar fylkisþingsins og ýmsa fylkisþingmenn, meðal annars nefndarformenn, leiðtoga meiri og minni hluta þingsins og fleiri. Þess má geta að einn fylkisþingmaðurinn, Tom Torlakson, er af íslenskum ættum. Sendinefndin mun einnig funda með vararíkisstjóra Kaliforníu, yfirmanni heimavarna fylkisins, viðskiptaráðherra, sveitarstjórnarmönnum, rektor og ýmsum prófessorum Kaliforníuháskóla í Santa Barbara, sérfræðingum og háttsettum embættismönnum á sviði umhverfis- og orkumála og fulltrúum viðskiptalífsins. Þá mun sendinefndin hitta Helga Tómasson, listrænan stjórnanda San Francisco ballettsins.        

                      

En - þarna er ekki svarað spurningunni um tilganginn með þessari sendinefnd, tilganginn með þessum gríðarlegu viðræðum, tilganginn með öllum þessum fundum.

 

Ef til vill hefði mátt ætla, að sendinefnd af þessu tagi væri ætlað að kynnast viðhorfum og starfsháttum og koma síðan heim með gagnlega þekkingu í farteskinu. Ætla mætti að þingmennirnir myndu nýta sér afrakstur ferðarinnar í vinnu sinni á Alþingi. Meðvituð víkkun á sjóndeildarhring, eða þannig. Starfskynning.

                          

En þessir þingmenn eru allir hættir!

                               

Alþingi hefur lokið störfum. Nýtt þing verður kosið eftir tæpan mánuð. Fyrir liggur að Sólveig Pétursdóttir verður ekki meðal þingmanna á næsta þingi, ekki Sigríður Anna Þórðardóttir, ekki Margrét Frímannsdóttir, ekki Hjálmar Árnason. Og þá ekki Kristinn Björnsson, sem líklegt má telja að verði einkum í forsvari fyrir sendinefnd Alþingis á fundunum með fulltrúum viðskiptalífsins.

                        

Er þetta eins konar útskriftarferð?

                          

Útskriftarferð - þar sem ekki verður farið á sólarströnd eða í næturklúbba eða skemmtigarða eða kvikmyndaverin í Hollywood eða á spennandi veitingastaði eða í berjamó, heldur á fundi! Þrotlausa fundi með þingmönnum og formönnum nefnda, vararíkisstjóranum - hvar verður Schwarzenegger? - og hreppsnefndarmönnum, sérfræðingum og prófessorum, embættismönnum og arftökum Kenneths Lay, og eru þá ekki allir upp taldir.

                             

Spennandi útskriftarferð, eða hvað?

                           

Kannski verður farið í bíó til að sjá Schwarzenegger.

                            

Áleitin spurning til viðbótar: Verður enginn túlkur með í för?

                         

Og svo þessi: Hver borgar brúsann?

                        

Það mætti hringja og spyrja út í þetta - tilkynningunni á vef Alþingis lýkur svona: Nánari upplýsingar um heimsóknina fást hjá almannatengsladeild í síma 563 0651 og 897 5672.  

                      

Skelfing er þetta annars óheppilegt svona rétt fyrir kosningar.

                       

Eða hvað finnst almannatengsladeildinni?

                                                     

En þvílík lukka samt, að ferð sendinefndarinnar stangaðist ekki á við landsfundi Sjálfstæðisflokksins og Samfylkingarinnar og framsóknarpönnukökukosningakaffiveitingafagnaðinn á Selfossi.

 

Forseti Alþingis í heimsókn til Kalíforníu

Athugasemdir

[Sigurður Ásbjörnsson, 17.4.2007 kl. 00:38]

Mín sýn á tiltækið er hér.

[Jón Steinar Ragnarsson, 17.4.2007 kl. 10:43]

Ég fæ nábít.  Þetta nær engri andskotans átt.

[Rúnar Haukur Ingimarsson, 17.4.2007 kl. 13:54]

Hef sagt áður og segi enn - Ísland=bananalýðveldi

[Jón Steinar Ragnarsson, 17.4.2007 kl. 14:11]

Hér er athyglisverð færsla viðskiptafræðings, sem ætti að vekja okkur til umhugsunnar um hvað spillingaraðallinn er að gera. 

[Margrét St Hafsteinsdóttir, 17.4.2007 kl. 19:48]

Flokkast þessi ferð ekki undir velferð? Velferðarkerfið hlýtur að borga brúsann

[Hlynur Þór Magnússon, 17.4.2007 kl. 20:19]

Nú liggur fyrir að íslenska ríkið borgar ferðakostnaðinn. Hann er hins vegar sagður sáralítill eða einungis nokkrar milljónir króna að meðtöldum mjög hóflegum dagpeningum, sem eiga að nægja fyrir gistingu og mat. Ekki kemur fram í tilkynningu Alþingis að makar annarra en Sólveigar Pétursdóttur séu með í för, en núna liggur fyrir að þeir eru það samt. Hins vegar eru makarnir ekki hluti af hinni formlegu sendinefnd Alþingis, nema Kristinn Björnsson. Makarnir borga sjálfir fyrir sig bensínið, eins og það er kallað, nema Kristinn, en ríkið greiðir allan kostnað hans. Ekki fást viðhlítandi svör við öðrum spurningum sem bornar hafa verið fram varðandi þetta mál (kannski varla von), nema hvað ekki er sérstakur túlkur með í för. Að ekki skuli fást svör við öðru sem spurt hefur verið um verður hver að túlka eftir sínu höfði. Svo sem eins og með tilganginn ...

En hafi einhver ekki skilið það, þá snerust vangavelturnar hér að ofan eiginlega ekki um krónufjölda ...

[Þorvarður Ragnar Hálfdanarson, 18.4.2007 kl. 04:21]

Ljómandi vangaveltur. Gaman væri að vita hver er tilgangurinn. Eru áform um að styrkja tengsl við háskóla í Kaliforníu, koma á stúdentaskiptum, liðka fyrir innflutningi léttvína eða koma á samvinnu um umhverfismál? Munu einhverjir hinna íslensku utanfara halda formlegar tölur eða verður þetta meira spilað eftir eyranu? Nýlega bauðst mér að vera viðstaddur fund íslenskrar sendinefndar á vegum HÍ með erlendum kollegum þeirra. Rætt var um aukna samvinnu á sviði vísinda og menntunar. Það var sendinefnd er Íslendingar geta verið stoltir af. Það var sendinefnd með agenda og hún sinnti því vel. Ég er ekki eins sannfærður um að umrædd sendinefnd Hlyns standi sig eins vel. Um ákveðna sendinefndarmenn og réttmæti þess að þeir ferðist utan á okkar kostnað mun ég ekki ræða frekar...

[gudrunmagnea (IP-tala skráð) 19.4.2007 kl. 15:12]

Ferðalag Páls Péturssonar fyrrverandi félagsmálaráðherra um heiminn þveran og endilangan ásamt eiginkonu sinni Sigríði Magnúsdóttir ætti að vera okkur í fersku mynni, það er ekki svo langt síðan. Páll náði ekki í prófkjöri tilskyldu atkvæðamagni og fór í heimsreysu með frúna á kostnað ríkisins...Svo koma hinir á eftir núna...Fyrrverandi olíuforstjóri umdeildur, laumast þarna í ferðina vegna þess að eiginkona hans er forseti Alþingis, kjörin til starfsins af alþingismönnum.
Almenningur í landinu lætur allt yfir sig ganga, nöldrar svolítið í hvert sinn sem þeim ofbýður en þagna að lokum og byrja að nöldra vegna næsta hneikslismáli.

[Guðrún Magnea Helgadóttir, 19.4.2007 kl. 16:46]

Hver man ekki eftir heimsreisu Páls Péturssonar þáverandi félagsmálaráðherra ásamt eiginkonu sinni Sigríði Magnúsdóttur þáverandi borgarfulltrúa eftir að Páll laut í lægra haldi í prófkjöri.. Þá var fólki ofboðið eins og núna.

Þetta með að núverandi og fljótlega fyrrverandi alþingismenn fari sísona í starfslokaferðalg til Kaliforníu ásamt mökum sínum og það á kostnað ríkisins er út úr öllu korti. Þarna fara saman fólk úr hinum ýmsu stjórnmálaflokkum í hinu besta bróðerni... Ég minni á að Sólveig Pétursdóttir fráfarandi forseti Alþingis og eiginkona Kristins Björnssonar fyrrverandi olíuforstjóra umdeildum í ólöglegu verðsamráði olíufélaganna var kosin forseti Alþingis af öllum alþingismönnum, einnig af stjórnarandstöðuflokkunum. Núna skemmta allir sér saman á kostnað almennings!

[Sædís Ósk Harðardóttir, 20.4.2007 kl. 20:13]

Mér finnst þetta vera sóun á almannafé