Vestfirðir sumarið 2007

Þessar vikurnar - og kominn alveg á síðasta snúning - er ég að ganga frá blaði sem heitir Vestfirðir sumarið 2007. Þetta er þrettánda árið í röð sem blaðið kemur út og síðasta skiptið sem ég annast það. Mikið skelfing er ég löngu leiður á þessu andskotans veseni. Kannski tekur einhver frískari við - ekki veit ég það og lítið kemur mér það við.

            

Af skiljanlegum ástæðum hefur blaðið breytt um nafn ár frá ári. Þannig nefndist það í fyrra Vestfirðir sumarið 2006. Lengi nefndist það Á ferð um Vestfirði [tiltekið sumar].

            

Hvað sem því líður, þá er tilgangur blaðsins tvíþættur. Annars vegar að hvetja landsmenn til ferðalaga um Vestfirði. Hins vegar að verða til nokkurrar leiðsagnar og upplýsingar ferðafólki sem kemur til Vestfjarða hverju sinni.

             

Blaðið er prentað í Prentsmiðju Morgunblaðsins enda er það er alltof stórt og  viðamikið til að það verði prentað í einhverri landsbyggðarprentsmiðju. Upplagið er um tólf þúsund eintök í broti sem er nokkru minna en dagblaðabrot en mun stærra en tímaritabrot. Allt litprentað á myndapappír og heft. Í fyrra var blaðið 64 síður. Það er sent á talsvert á þriðja hundrað staði um allt land, þar sem það liggur frammi án endurgjalds. Alltaf hefur það klárast fljótt og sífellt verið að biðja um meira.

            

Ég nefndi tvíþættan tilgang blaðsins. Einhver kynni að hugsa með sér eitthvað á þessa leið: Ætli þriðji og kannski stærsti parturinn af tilganginum sé nú ekki sá að hagnast á útgáfunni?

           

Svarið við því er einfalt:

                 

Nei.

                          

Tekjur útgáfunnar frá upphafi hafa verið auglýsingar. Síðustu árin hefur auk þess verið leitað til sveitarfélaga á Vestfjörðum eftir framlögum. Þeirri umleitan hefur í flestum tilvikum verið vel tekið og þess vegna hefur blaðið verið talsvert myndarlegra síðustu árin en áður var. Þannig leggja helstu sveitarfélög á Vestfjörðum fimmtíu þúsund krónur hvert til útgáfunnar að þessu sinni eins og í fyrra.

     

Blað þetta er ókeypis vettvangur fyrir alla þá sem stunda ferðaþjónustu á Vestfjörðum. Þar geta þeir komið á framfæri ókeypis upplýsingum um sjálfa sig og það sem þeir bjóða. Þetta gildir jafnt um einstaklinga, fyrirtæki og sveitarfélög. Engin tengsl eru milli umfjöllunar um svæði og viðburði og auglýsinga í blaðinu. Alltaf er reynt að gæta jafnræðis og jafnvægis í þeim efnum.

        

Blaðið er einfaldlega opinn og ókeypis vettvangur fyrir alla þá sem hafa eitthvað að bjóða eða sýna eða selja ferðafólki á Vestfjörðum.

        

Ég hef alltaf reynt að gera mitt besta. Ekki hef ég riðið feitum hesti frá þessari vinnu peningalega! Hins vegar hef ég á hverju ári legið undir aðfinnslum og jafnvel skömmum þegar blaðið er komið út. Alltaf er hægt að finna að einhverju. Ýmsum finnst sitt svæði sniðgengið í skrifum og myndavali.

        

Samt er alltaf jafnerfitt að svíða út upplýsingar. Flestir virðast telja sig vera að gera mér persónulegan stórgreiða með því að láta í té upplýsingar um þjónustu sína - ef þeir gera það þá á annað borð eftir að ég hef margsent tölvupósta og marghringt. Á hverju ári.

       

Eitt annað er ekki heldur gott, þótt á hinn bóginn sé. Sumir láta vissulega í té prýðilegar upplýsingar og senda mér efni og myndir. Alveg yfirdrifið mikið, og það er raunar gott.. En - þeir eru svo fáir, að birting á öllu því efni myndi raska hlutföllunum í blaðinu. Og svo er ég skammaður ...

         

En - að einhver hafi nokkurn tímann haft samband og sent mér upplýsingar, efni og myndir að fyrra bragði öll þessi ár? Svarið er einfalt og skýrt: Nei. Kannski hefur blaðið ekki komið út nógu lengi til að hafa unnið sér þegnrétt og virðingu. Líklega þarf meira en einn eða tvo áratugi til þess.

        

Svo vælir hver í sínu horni og kvartar yfir verkum mínum og vinnubrögðum við ferðablað Vestfjarða ár hvert. Allt ómögulegt eins og alltaf. Og svo væla allir alltaf yfir því að allt sé að fara til fjandans á Vestfjörðum. Að stjórnvöld geri ekkert o.s.frv.

     

Stjórnvöld! Væri ekki rétt að fólk reyndi að hjálpa sér sjálft í stað þess að væla? Reyndi t.d. að nota þau vopn sem standa til boða? Eins og t.d. kostnaðarlausa kynningu á landsvísu sem allir í ferðaþjónustu á Vestfjörðum eiga kost á?

          

Ég bara spyr.

           

Og bæti við: Ég er í símaskránni! Auk þess hefur netfangið mitt ásamt helstu upplýsingum um ferðablað Vestfjarða verið sent - að þessu sinni eins og endranær - á nánast alla sem stunda ferðaþjónustu á Vestfjörðum eða hafa einhvern hag af henni.

            

En núna ætla ég að gefa kisu silung.

          

Og hananú!

 

Athugasemdir

[Hlynur Þór Magnússon, 4.5.2007 kl. 03:17]

Þakka þér, Keli minn. Ég mun annast Hlunnindasýninguna hér á Reykhólum í sumar eins og í fyrra. Þar skipa afi þinn og amma í Hvallátrum veglegan sess í myndasyrpum um nýtingu æðardúns og sels. Jón Daníelsson afi þinn, sá virðulegi góði og gráskeggjaði maður, og móðir mín (móðir hins virðulega góða og gráskeggjaða manns Hlyns Þórs Magnússonar) voru systkinabörn.

[Gunnar Th. (IP-tala skráð) 4.5.2007 kl. 07:50]

Mér hefur fundist þetta kynningarblað Vestfjarða bæði vel unnið og skemmtilegt frá því farið var að gefa það út. Kannski má segja að það sé meðal þess sem heldur í manni lífinu (eða a.m.k. glórunni) yfir veturinn hér syðra. Maður sankar að sér ferðapésum og kynningarblöðum á þvælingi sumarsins, grípur svo til þeirra þegar veturinn sækir að og endurupplifir sumarið. Sér jafnvel hvers maður fór á mis og reynir að skipuleggja næsta sumar með hliðsjón af því!

Það væri illt ef þessi útgáfa leggðist af, það er jafnframt illt að lesa um áhugaleysi þeirra sem svo mikla hagsmuni og kynningu hafa af útgáfu blaðsins. 

Kveðja, Gunnar Th.

[Katrín, 4.5.2007 kl. 21:41]

Mér hefur ætíð fundist fengur í þessu blaði og það til fyrirmyndar í alla staði.  Hef nýtt mér þann fróðleik sem þar birtist í ferðum mínun sem leiðsögumaður hér á árum áður.  Vekur athygli allra sem það sjá, Íslendinga sem útlendinga.  Hafðu þökk fyrir Hlynur!