Brotlending hjá Fréttastofu Ríkisútvarpsins

Sú var tíðin að Fréttastofa Ríkisútvarpsins var vel mönnuð. Enn er þar fólk sem hefur góða almenna þekkingu og gott vald á íslensku máli en ekki virðast lengur vera gerðar kröfur um þessa eiginleika hjá þeim sem þangað eru ráðnir. Ef til vill vegna þess að viljann eða metnaðinn vantar, ef til vill vegna þess að þeir sem ráðningar annast hafa ekki burði til að meta slíkt.

                       

Ástandið á fréttavefjunum mbl.is og visir.is blasir við og líklega er fátt við því að segja eða gera. Aftur á móti er Ríkisútvarpið enn í orði kveðnu einhver helsta kjölfesta íslenskrar menningar. Einmitt þess vegna er það grátlegt, að Fréttastofa Ríkisútvarpsins skuli vera á leiðinni niður á sama plan og vefirnir sem nefndir voru.

                         

Upphaf fréttar á ruv.is um hádegisbilið í dag - óbreytt á sjöunda tímanum í kvöld:

                          

Sjónarvottar segja að TF Sif þyrla Landhelgisgæslunnar hafi brotlent mjúklega við Straumavík í gærkvöldi. Þyrlan hafi ekki hrapað í sjóinn heldur lent. TF-Sif var við æfingar úti fyrir Straumsvík ásamt félögum úr björgunarsveit Hafnafjarðar þegar hún þurfti skyndilega að lenda á haffletinum. Verið var að æfa hífingar úr sjó og voru þrír bátar undir þyrlunni. Golfarar á Hvaleyrarvelli sáu margir glögglega þegar þyrlan brotlenti.

                           

Fréttin á ruv.is er miklu lengri og þar eru miklu fleiri ambögur, málfarsvillur, stafsetningarvillur og innsláttarvillur.

                        

Spyrja má: Hvað er brotlending? Telst það brotlending að lenda mjúklega? Hvers vegna að tilgreina að golfarar á Hvaleyrarvelli (í Hafna-firði eða við Strauma-vík?) hafi séð „margir glögglega þegar þyrlan brotlenti“ þegar jafnframt kemur fram að hún brotlenti alls ekki?

 

Þessara spurninga er ekki síst spurt núna vegna þess að í kvöldfréttum og Speglinum er enn verið að hnykkja á ruglinu. Já, hún hrapaði, skv. máltilfinningu Fréttastofu Ríkisútvarpsins.

                                

Viðbót: Ætli þetta sé undirbúningur fyrir sölu Ríkisútvarpsins? Verðfella það fyrir söluna? Getur það kallast gæfulegt þegar sjálfur útvarpsstjórinn gengur í verk almennra starfsmanna til að leggja á borð fyrir okkur almenning misþyrmingar á íslensku máli og almennri skynsemi? Höfuðið og limirnir?

 

TF-Sif komin á land

Athugasemdir

[Sigurður Bogi Sævarsson (IP-tala skráð) 17.7.2007 kl. 20:19]

Allar þessar athugasemdir um málfarið eru hárréttar. En skoðum efnisatriðin: Enginn fjölmiðlungur hefur haft fyrir því í dag að hringja í þá sem þekkja til þyrluflugs almennt og spyrja hvað kunni að hafa gerst, setja þetta óhapp í samhengi við önnur þyrluslys á Íslandi, tala við verksmiðjurnar ytra og fá upplýsingar um hættuatriði varðandi þessa tegund þyrlna og svo framvegis. Tala við gamla flugstjóra TF-SIFjar eins og Pál Halldórsson og Boga Agnarsson og spyrja hvað þeir telji að hafi klikkað eða gæti hafa farið úrskeiðis. Fullt af spurningum sem blasa við, en enginn reynir að botna fyrripartinn.

sbs

[valg, 17.7.2007 kl. 20:20]

Við segjum "eitthvert óhapp". ". . . þó höfundurinn hafi" o. s. frv. Í þessu samhengi getur "þó" ekki staðið eitt og sér. Annaðhvort verður að standa "þó að" eða "þótt".

[Sævar Helgason (IP-tala skráð) 17.7.2007 kl. 22:44]

Það veitir ekki af að halda athygli okkar vakandi fyrir íslenzku málfari og stíl

Hafðu þökk fyrir það ,Hlynur Þór

[Skafti Elíasson, 17.7.2007 kl. 23:48]

Ég tek svosem ekki eftir málvillum,, varla skrifandi sjálfur en ég tók eftir þessum fáránlegu spurningum og annað sem pirraði mig það var yfirdrifni fréttaflutningur http://skaftie.blog.is/blog/skaftie/entry/264709/ með bestu kveðjum.

[Ólafur Jóhannsson, 17.7.2007 kl. 23:54]

Það má finna mörg dæmi um ambögur og og málvillur hjá öllum fréttastofum þessa lands og ekki vanþörf á að benda á þær.  En það er viðaukinn við pistil þinn sem veldur mér heilabrotum, þetta með söluna.  Hvað á að selja ef RÚV yrði auglýst til sölu? Það er þá líklega aðeins fasteignir og búnaður, ekki er hægt að selja dagskrána eða starfsfólkið?  Og það eru ekki miklar líkur til að nokkur fjárfestir vilji kaupa báknið við Efstaleiti. Það er hægt að hefja rekstur útvarps og sjónvarps með mun minni tilkostnaði.  Það hefur margoft verið talað um að selja Rás 2 en það er ekki hægt. Rás 2 er vinsælasta útvarpsrás landsins vegna þeirrar dagskrár sem starfsfólkið þar hefur sett saman.  Þú selur ekki Óla Palla eða Guðna Má, það er alveg ljóst. Og því spyr ég aftur, hvað á þá að selja?

[halkatla, 18.7.2007 kl. 00:03]

ég er alls ekki góð í að taka eftir svona villum, ég endurtek; alls ekki góð! en samt sé ég alveg hvað þú ert að tala um og er að verða geðveik á mbl. Þetta er ekki nógu gott. Takk fyrir frábæran pistil - menningarsnobbið í mér þarf á þessu að halda.

[Sigurður Þórðarson, 18.7.2007 kl. 00:30]

Takk fyrir ádrepuna, auk þess ég sting upp á að skrifa fréttastofa með litlum staf.

[Jón Steinar Ragnarsson, 18.7.2007 kl. 03:26]

Jamm....eina gengisfellingin sem maður verður var við, er í málfarsmetnaði ríkisútvarpsins.  Það er þó bót í máli að þetta ku hafa átt sér stað.  Annað virtist raunin með Lúkarsarmálið alræmda.

[Sigríður Hrönn Elíasdóttir, 18.7.2007 kl. 13:52]

Hjartanlega sammála ykkur um málfarið í fjölmiðlum. Hins vegar finnst mér mikill missir af þér Hlynur úr þessari starfsstétt. Bestu tímabil fréttablaðsins BB á Vestfjörðum voru þegar þú varst blaðamaður þar. Það væri mikill fengur fyrir fjölmiðla ef þú byrjaðir aftur sem fjölmiðlamaður og þá helst í fréttaflutningi. Það sem einkenndi þig sem fréttamann var að þú varst oftast fyrstur með fréttirnar, líka um helgar, húmorinn þar þegar við átti og svo nákvæmnin í fréttaflutningnum sem var alltaf í öndvegi, ég þarf ekki að taka það fram að íslenskan var upp á punkt og prik. Ég skora á þá sem eru í forsvari fyrir fjölmiðla að fara nú á hausaveiðar og ná þér.

[Málgæðingurinn (IP-tala skráð) 18.7.2007 kl. 14:09]

Þetta lið gerir í brækurnar á hverjum degi og meira að segja hundar flýja til fjalla undan fnyknum.