Skilur einhver þessa frétt?

Ef einhver skilur þessa frétt, þá gefi hann sig vinsamlegast fram hér í athugasemdadálkinum. Er búið að flytja norðurskautið suður að Hvítahafi? Ef ég man rétt, þá er Severodvinsk skammt frá Arkangelsk, sem er á svipaðri breiddargráðu og Reykjavík. Eða er hér um tvö óhöpp að ræða, annað í dag og hitt sl. fimmtudag, sem mér skilst að hafi veríð í gær?

                    

Erlent | mbl.is | 27.7.2007 | 12:02

Sprenging í rússneskum kafbáti

Rússneskur kafbátur skemmdist mikið í sprengingu sem varð á norðurskautinu í dag, en verið var að gera við bátinn þegar sprengingin varð. Samkvæmt rússneskum fjölmiðlum lést enginn.

Rússneskir embættismenn hafa ekki viljað tjá sig hvort um kjarnorkuknúinn kafbát hafi verið að ræða eður ei. Interfax fréttastofan segir enga óvenjulega geislavirkni hafa mælst í Severodvinsk þar sem atvikið átti sér stað sl. fimmtudag. Um 215 fermetra svæði á kafbátaskrokknum skemmdist í sprenginunni segir rússneska útvarpsstöðin Ekho Moskvy.

- - -

Viðbót: Leyfi mér að smella hér inn annarri sérkennilegri frétt af mbl.is, sem ég hnaut um fyrir skömmu og vistaði til nánari umhugsunar. Fréttinni fylgdi mynd af Amalíenborg. Líklega er ég bara svona skilningslaus.

Veröld/Fólk | mbl.is | 25.7.2007 | 11:58

Blogg sigurvegaranna

Á blogginu er varla talað um annað um þessar mundir en að ég taldi mig eiga möguleika á að landa sigri á stórmóti og gerðist atvinnumaður hefur verulega kofa, eða glæsilegt tónleikahús.

Þar sem þrír kylfingar skipstjórnarmenn á fiskiskipa og öryggismálum sjómanna í þróunarlöndunum meðhöndlun hrauna, þar sem verði háttað til Vestmannaeyja, spurður um viðbrögð sín við skýrslutöku hjá lögreglu og er þar lítill tími gefist til lesenda blaða með gagnrýnandinn bað bandarísku þátttakendurnir 20 lentu hins vegar einkar auðvelt að reikna sig fram til þessa. Viðburðir en erlendir á að samkvæmt kortabók Landmælinga heitir hann? 3 Fræg þýsk leikkona verður orðið breytingar virðast hins vegar upp um eitt sæti og er í því fimmta.

Sprenging í rússneskum kafbáti

Hjólreiðamenn skyldaðir í vitsmunapróf?

Hjólreiðakeppnin Tour de France minnir á raunveruleikaþætti þar sem spurningin er ekki hver sigrar í hverjum áfanga heldur hverjum verður hent út næst. Ég hef nokkuð lengi fylgst með umræðunni um þessi mál á erlendum vefjum, einkum spiegel.de. Hver afreksmaðurinn í hjólreiðum eftir annan hefur komið fram og vitnað um þá spillingu sem mjög lengi hefur viðgengist og jafnframt sakað fjölda annarra um þátttöku í slíku. Þeir hafa haldið því fram, að engin leið sé að vera í fremstu röð nema með svindli, sem raunar er orðið að heilli vísindagrein eða sérgrein innan læknisfræðinnar.

 

Svo virðist sem hugarfarið hjá þeim sem eiga keppnisliðin sé að breytast einmitt núna - ekki kannski vegna aukins siðferðisþroska heldur af illri nauðsyn. Skriðan verður ekki stöðvuð úr þessu. Samsærið hefur verið rofið. Hjólreiðarnar eru orðnar að hreinum farsa og styrktarfyrirtækin hætta stuðningi hvert af öðru og vilja ekki leggja nafn sitt við það sem þarna viðgengst.

 

Það sem mér virðist þó einna merkilegast í umræðunni er einkum tvennt. Annars vegar fullyrðingar þess efnis, að brátt komi röðin að atvinnumönnum í knattspyrnu í þessum efnum. Hins vegar að ekki væri minni ástæða til að láta hjólreiðakappana gangast undir vitsmunapróf en lyfjapróf. Með hliðsjón af orðum og gerðum margra af þessum görpum að undanförnu er það vel skiljanlegt.

 

Michael Rasmussen vikið úr Tour de France

Ljósmynd af ljósmyndara á Moggabloggi

Kjartan Pétur Sigurðsson ljósmyndari og bloggari á Moggabloggi lenti hér á Reykhólum í kvöld og tók bensín í Jónsbúð. Ég leyfði mér að taka ljósmynd af ljósmyndaranum þegar hann fékk einhvern stimplunarpassa eða hvað það nú er hjá Jóni kaupmanni. Kjartan flýgur á fisi og var að koma frá Ísafirði á leið suður.

 

Þeir voru sex félagarnir á sex flugvélum sem lentu hér núna í kvöld - eða fimm flugvélum og einu fisi - en fjórir þeirra komu hér við á leiðinni vestur fyrir hádegið í dag. Hópurinn var í sunnudagsbíltúr (eða þannig) á þriðjudegi og skrapp til Ísafjarðar að fá sér að borða hjá meistarakokknum Magnúsi Haukssyni í Tjöruhúsinu í Neðstakaupstað. Þeir urðu ekki fyrir vonbrigðum með rauðsprettuna hjá Magga og Rönku sögðu þeir. Kannski hefur sjálfur Halldór Hermannsson skötufræðingur og Rönkupabbi verið að hjálpa tengdasyninum í kokkeríinu. Magnús er samt alveg sjálfbjarga á þeim vettvangi og rúmlega það hefur mér fundist.

 

Meira á bb.is á morgun. Ég vona að Kjartan hafi ekki tekið myndir af mér. Til vara að þær verði ekki birtar.

 

> bb.is 24.07.07 Á leið í hádegismat á Ísafirði

 

Örsögur frá nýliðinni ævi

Sigurður Hreiðar sveitungi minn úr Mosfellssveitinni sem eitt sinn var klukkaði mig um daginn. Núna er klukkið óðara horfið úr tísku eins og mýstrókur þegar kular og þess vegna orðið tímabært að svara með nokkrum örsögum af handahófi frá fyrri hluta liðinnar ævi. Eða er hún kannski ekki liðin?

 

0077                      

Eftir að ég fékk hvolpavitið var ég óskaplega skotinn í Diddu skólasystur minni sem átti heima niðri í Hlíðartúni og engin furða. Ég smíðaði hringa handa okkur úr girðingarvír sem ég flatti með hamri og gullbronsaði. En ég þorði ekki að segja henni frá trúlofun okkar fyrr en fjörutíu árum seinna.

 

0119                          

Sumarið 1960 þegar vegavinnuflokkurinn var að flytja rétt einu sinni sat eldhússkúrinn sem var á pallinum hjá Magnúsi í Garði fastur milli hamraveggjanna á leiðinni niður Almannagjá. Það var gaman þangað til Siggi á Bakka sagði: Ekki veit ég hvenær við fáum að éta ef við getum ekki losað hann.

 

0305                            

Sumarið þegar ég var átján ára vann ég á Tollpóststofunni í Reykjavík. Daginn þegar ég byrjaði voru kallarnir að ræða hvað þeir ætluðu að gera í sumarfríinu. Guðjón gamli sagðist ekki ætla að fara neitt núna. En ég er að hugsa um að skreppa norður í haust og vera við jarðarför bætti hann við.

 

0566                         

Þegar ég var afleysingamaður í Hegningarhúsinu við Skólavörðustíg voru heilu dyngjurnar af fjögurra laufa smára í garðinum en það er gæfumerki. Einu sinni sem oftar var ég með fangana úti en þegar ég var búinn að smala inn vantaði einn. Hann var svo gæfusamur að geta falið sig í smárabreiðunni.

 

2113                       

Ekki hef ég flutt sand til Sahara ennþá að minnsta kosti en einu sinni fluttum við fjögur þúsund tonn af marmaragrjóti frá Brasilíu til Livorno sem heitir Leghorn á ensku. Skammt frá eru marmaranámurnar frægu í Carrara og ég veit að margir eiga fína gripi úr ekta ítölskum Carraramarmara frá Brasilíu.

 

2341                        

Þegar ég vann við timburútskipun í Arkangelsk á dögum Sovétríkjanna voru alltaf hermenn á vappi við höfnina. Þeir voru í svörtum síðfrökkum enda er ákaflega kalt þarna á vetrum og báru riffla og styttu sér stundir við að skjóta rottur. En ég hugsaði með mér: Nú kemur sér vel að vera ekki rotta.

 

EIGHT DAYS NO NIGHTS

Kunnugleg þótti mér fréttin af heimsókninni til Íslands í ferðatímaritinu Condé Nast Traveler þegar ég sá hana áðan á mbl.is. Frá þessu var sagt á bb.is í byrjun þessa mánaðar og þar var jafnframt tengt beint í greinina í heild á vef tímaritsins. Í fréttinni á mbl.is er það ekki gert heldur er tengt á vef Ferðamálastofu þar sem aftur er vísað á annan vef þar sem sagt er að hægt sé að komast á vef tímaritsins ...

> bb.is 05.07.07 Fegurð Vestfjarða lýst í bandarísku ferðatímariti 

> Condé Nast Traveler - EIGHT DAYS NO NIGHTS 

Verðmæt landkynning í Condé Nast Traveler

Áhugaverður uppgröftur í Vatnsfirði við Djúp

Frægt er svar séra Baldurs Vilhelmssonar, fyrrum prófasts í Vatnsfirði við Djúp, þegar fréttamannskjáni á Kirkjuþingi spurði hvern prestinn á fætur öðrum hvaða prestsverk væri nú skemmtilegast. Baldur svaraði stuttaralega: Að jarða framsóknarmenn.

 

Núna er unnið að uppgrefti í Vatnsfirði og sú spurning hefur vaknað hvort fornleifafræðingarnir hafi komið niður á eitthvað af þessum framsóknarmönnum. Ekki virðast þeir vera margir eftir ofanjarðar, hvort sem það er nú dugnaði séra Baldurs að þakka ...

 

Uppgröftur hafinn að nýju í Vatnsfirði

Alltaf sömu mannlegu mistökin nokkrum sinnum í viku?

Einkennilegt er að sömu mannlegu mistökin skuli eiga sér stað nokkrum sinnum í viku. Líka að litið skuli vera á þessi reglubundnu „óhöpp“ nánast sem sjálfsagðan hlut, að því er virðist.

 

Fer ekki að verða tímabært að athuga eitthvað með starfsmanninn sem gerir alltaf þessi mistök nokkrum sinnum í viku? Eða að athuga eitthvað með yfirmenn hans? Yrði ekki athugað eitthvað með kokkinn ef eldamennskan mistækist hjá honum nokkrum sinnum í viku árið um kring, svo að dæmi sé tekið?

 

Eiginlega botna ég ekkert í þessu. En það er líklega ekki að marka.

                      

Mannleg mistök urðu þess valdandi að talsverður reykur slapp út úr ofni í járnblendiverksmiðjunni á Grundartanga í dag. Óhöpp sem þessi verða nokkrum sinnum í viku, að sögn deildarstjóra hjá járnblendinu ...  

 

Reykur frá járnblendiverksmiðjunni Grundartanga

líkþorn, slabbdregill, firðtal, slembiúrtak, legslímuflakk, njálgur, páka

Leitin að ljótasta orði íslenskrar tungu: Hátt í sextíu færslur eru komnar í athugasemdadálkinn og tillögur um fjölmörg afar frambærileg orð. Þar má nefna (án þess að ég taki afstöðu að sinni) orðin slembiúrtak, búkur, legslímuflakk, líkþorn, drulla, blogg, ristruflanir, togleðurshólkur, afturúrkreistingur, legremburotta, áriðill, náriðill, þúsöld, raggeit, njálgur, spartltúba, kunta, firðtal, héddna, rasssæri, slabbdregill, páka, afgjaldskvaðarverðmæti, nýsigögn, hortittur, æla ...

 

Eflaust leynast enn margir gimsteinar ljótleikans glóandi í málhaugnum okkar ylhýra, ástkæra. Við finnum örugglega margt fleira ljótt ef við leitum í sálarfylgsninu. Söfnum áfram tillögum fram yfir helgi og förum svo að skilja sauðina frá höfrunum, láta renna undan rjómanum, slíta upp ljótasta illgresið og hnýta saman í vönd ...

 

Nokkrir hafa tilnefnt Framsóknarflokkinn. Það er út af fyrir sig skiljanlegt en ég efast um að rétt sé að hafa sérnöfn í þessari samkeppni. Framsóknarmenn hafa báðir haft samband við mig og látið í ljós óánægju sína. Hins vegar kæmi orðið framsóknarmaður (eða sjálfstæðismaður, eða einfaldlega stjórnmálamaður) e.t.v. til greina við úthlutun sérstakra heiðursverðlauna, líkt og í Óskarnum.

 

Hugsið ykkur allt þetta hráefni í ljótasta ljóð íslenskrar tungu!

 

Svo fæ ég líklega viðurkenningu (eða verðskuldaða refsingu) fyrir ljótustu bloggfyrirsögn þúsaldarinnar.

 

> 20.07.2007   Ný samkeppni: Ljótasta orð íslenskrar tungu

 

Sömu vinnubrögð, sama þroskastig

Er ekki rétt að vísa málum sem varða Saving Iceland til barnaverndarnefndar, sbr. eftirfarandi frétt á mbl.is í gær? Voru skemmdarverkin sem þar er greint frá e.t.v. á vegum Saving Iceland? Eða finna hóparnir fyrirmyndir hvorir hjá öðrum?

                         

Þrír ungir piltar á barnaskólaaldri unnu töluverðar skemmdir á byggingasvæði á höfuðborgarsvæðinu en óskað var eftir aðstoð lögreglu vegna þessa í gærmorgun. Þegar komið var á byggingasvæðið blasti við ófögur sjón en búið var að brjóta nokkur ljós á stóru vinnutæki og við kaffiskúr.

Samkvæmt upplýsingum frá lögreglu var veggjakrot þar einnig að finna og grjóti hafði verið kastað í rúður svo sprungur mynduðust. Þá hafði málningu verið skvett á nærliggjandi íbúðarhús og við annað hús mátti sjá málningarskvettur á skjólvegg og útihúsgögnum.

Við rannsókn málsins beindust böndin fljótt að áðurnefndum piltum. Í fyrstu vísuðu þeir hver á annan en sannleikurinn kom þó fljótt í ljós. Málið verður sent til barnaverndarnefndar.

Málningu hellt á skrifstofur Athygli

Ný samkeppni: Ljótasta orð íslenskrar tungu

Fjarskyld frænka mín af Djúpadalsætt í Austur-Barðastrandarsýslu, Anna Ólafsdóttir Björnsson, stendur hér á Moggabloggi fyrir vali á fegursta orði íslenskrar tungu. Í viðtali í fréttum Sjónvarpsins í gærkvöldi kvaðst hún aðspurð ekki hyggjast leita að ljótasta orðinu. Sagði að það gæti einhver annar gert.

 

Hér með efni ég til samkeppni um ljótasta orð íslenskrar tungu. Tek fram, að þetta er alls ekki gert í neinu óvirðingarskyni við þann skemmtilega leik sem Anna fitjaði upp á, heldur einfaldlega í eðlilegu framhaldi af honum.

 

Tilnefningar óskast hér í athugasemdadálkinum. Framhaldið verður síðan væntanlega nokkuð í svipuðum dúr og hjá Önnu ...