Draugagangur á Moggabloggi?

Í dag varð ég fyrir sérkennilegri reynslu hér í bloggheimi. Einhvern tímann kringum hádegið leit ég á forsíðuna á Moggabloggi og sá þar nýja færslu frá manni sem er vel þekktur í sinni stétt; var raunar kollega minn lengi þótt við hefðum aldrei hist eða talast við, það ég man. Þarna var hann að fjalla um tiltekið umferðarslys og kvaðst hafa heyrt að ökumaðurinn hefði ákveðið að binda endi á líf sitt og ástarsorg með þessum hætti. Ég skrifaði stutta athugasemd við þetta blogg, eina málsgrein, efnislega á þessa leið: Mér finnst eiginlega ótækt að fjalla með þessum hætti um svo persónuleg mál á opinberum vettvangi.

Síðdegis hringdi gemsinn minn. Áðurnefndur bloggari kynnti sig og krafði mig svara um það, hvað ég meinti eiginlega með athugasemdinni. Mér vafðist eitthvað tunga um tönn, sjaldan slíku vant, enda getur þvælst fyrir manni að útskýra hluti sem ættu að vera auðskildir. Samt reyndi ég að umorða skoðun mína þannig að hún skildist, en á meðan sleit viðmælandinn samtalinu umyrðalaust, skellti á, eins og kallað er.

Ég ætlaði þessu næst að líta aftur á téða bloggsíðu, en þá var hún ófinnanleg. Hún er enn ófinnanleg hér á Moggabloggi, hreinlega horfin, og væri ekki fyrir símanúmerið í gemsanum mínum, skráð kl. 16.08, þá héldi ég kannski að mig hefði dreymt þetta. Eða er þetta einhver draugagangur?

 

Athugasemdir

[Katrín Snæhólm Baldursdóttir, 1.2.2007 kl. 23:44]

Sammála að þetta er ekki við hæfi á setja á bloggið.

[Kolgrima, 2.2.2007 kl. 01:42]

Mér finnst að þú ættir að gleðjast yfir skjótum og góðum árangri ;)

[Þorvarður Ragnar Hálfdanarson, 2.2.2007 kl. 03:04]

Ekkert af þessu gerðist, kæri Hlynur. Í ár er öfugt hlaupaár og því er fyrsti dagur mánaðarins tekinn frá oss. Febrúar hefst á hinum öðrum degi. Á morgun verður allt sem fyrr.

[Hlynur Þór Magnússon, 2.2.2007 kl. 03:10]

Að læknisráði bíð ég dagrenningar.

[Hlynur Þór Magnússon, 3.2.2007 kl. 07:59]

Kannski erum við ekki einu sinni til, kæra Geimfrú, kannski erum við einungis draugar í hugskoti einhvers annars. Varðandi læsinguna - stundum finnst manni ráðlegast að læsa heimilinu um stund þegar allt er í rusli. Ég var í senn að taka til og prófa hlutina; skemmst er frá því að segja, að þar var verr af stað farið en heima setið. Við þetta hef ég að auki dottið út úr heiðurslaunaflokknum hér á Moggabloggi, eða hvað á að kalla það, eða verið felldur af þeim lista; veit ekki hvort heldur er.