Bandaríkjaforseti flytur hátíðarávarp á afmælisdegi Reykhólahrepps

Jafnan þegar einhver verður hundrað ára, að ekki sé nú talað um hundrað og fimm ára, þá kemur mynd og klisjufrétt í fjölmiðlum þar sem segir að viðkomandi hafi fagnað afmælinu. Fagnað hundrað og fimm ára afmæli sínu!

 

Mikið á ég erfitt með að trúa þessu. Sjálfur varð ég sextugur í vor og fagnaði ekki þeim áfanga. Þegar ég var krakki var afmælið ánægjulegur viðburður á þroskabrautinni. Þegar komið er yfir hæðina er afmælið ekki síst áminning þess, að sífellt styttra er eftir.

 

Þegar barnsárin eru að baki er afmælið stund til að staldra við á göngunni. Við lítum yfir farinn veg en jafnframt eitthvað fram á veginn. Því eldri sem við erum, þeim mun meira er að skoða að baki og þeim mun styttri er spottinn framundan.

 

Sennilegt þykir mér, að fólk sem fagnar hundrað og fimm ára afmæli sínu sé gengið í barndóm á nýjan leik. Búið að tapa út seinustu hundrað árunum. Til að hnykkja á þessu fá allir sem verða 105 ára gamlir bréf varðandi umferðarfræðslu og aðsteðjandi grunnskólagöngu.

 

En afmælin eru fleiri en í lífi okkar mannfólksins. Viðburðir eiga afmæli, mannvirki eiga afmæli, hundar eiga afmæli og jafnvel kýr. Þjóðhátíðin er afmælisfagnaður.

 

Stundum er því líka fagnað að einhver hafi dáið. Mig minnir að það hafi verið blað allra landsmanna sem greindi frá því á sínum tíma, að því væri fagnað um allan heim að 200 ár voru liðin frá andláti Mozarts. 

 

Núna var ég að ganga frá atburðadagatali sumarsins í Reykhólahreppi. Hér eru ýmis afmælin ef grannt er skoðað. Svo að ég nefni tvo jafnaldra mína hér, þá er Hótel Bjarkalundur sextíu ára núna í sumar, elsta sveitahótel hérlendis, og Grettislaug á Reykhólum er líka sextug. Íbúðarhúsið á Höllustöðum í Reykhólasveit fagnar á þessu ári hundrað ára afmæli sínu ...

 

Reykhólahreppur á afmæli 4. júlí eins og Bandaríkin. Hann verður tvítugur eftir þrjár vikur. Eiginlega er hér um eins konar bandaríki að ræða, því að fyrir tuttugu árum voru fimm sveitarfélög við innanverðan Breiðafjörð og úti á Breiðafirði sameinuð undir nafni hins nýja Reykhólahrepps (Geiradalshreppur, Reykhólahreppur, Gufudalshreppur, Múlahreppur og Flateyjarhreppur). Mörgum er ókunnugt um að Breiðafjarðareyjar eru að mestu leyti í Reykhólahreppi. Flatey á Breiðafirði er okkar Hawaii. Mér skilst að Bush forseti muni ávarpa þjóð sína á afmælisdegi Reykhólahrepps.

 

Leyfi mér að minna á, að Reykhólar eru ekki á Barðaströnd, þó svo að fjölmiðlar ali á því hvenær sem héðan eru fluttar einhverjar fréttir. Barðaströndin er ekki einu sinni í Reykhólahreppi, þó að hann sé afar víðlendur. Héðan frá Reykhólum er um 140 km akstur þangað til komið er út á Barðaströnd. Annars er Barðaströndin yfirleitt fremur stór í fréttum fjölmiðla. Þannig var sagt frá því fyrir nokkrum dögum, að týnda kajakfólkið hefði fundist á Rauðasandi á Barðaströnd. Það er líka nýmæli í landafræðinni.

 

Er ekki annars Reykjavík í Þingvallasveitinni og Grindavík í Vestmannaeyjum?

 

Þegar stórt er spurt, eins og kellíngin sagði ...

 

Athugasemdir

[Guðný , 14.6.2007 kl. 11:58]

Eins og talað út frá mínu hjarta þetta með Barðaströndina. Búið að pirra mig í mörg ár.

[Guðný , 14.6.2007 kl. 12:00]

P.S. Gleymdi að setja nafnið mitt undir.

Guðný

[erlahlyns.blogspot.com, 14.6.2007 kl. 16:48]

Til að kæta þig þá var frá upphafi sagt í DV að þau hafi fundist í Djúpafirði í Reykhólahreppi.

RÚV, Mbl og Vísir töluðu hinsvegar um þessa blessuðu Barðaströnd.

[erlahlyns.blogspot.com, 14.6.2007 kl. 16:49]

Afsakið! Í RÚV, Mbl og Vísi var talað um ...

[Stefanía, 15.6.2007 kl. 01:09]

Nafnið þitt vakti forvitni mína, því að ég á son sem er nafni þinn, nema að millinafn hans er Snær.

Svo sé ég að þú ert Reykhólahreppsmaður, en þaðan er ég ættuð og á þar sumarhús,sem ég uni mér hvað best í og fer einmitt þangað á morgun !

[Halldór Egill Guðnason, 15.6.2007 kl. 15:32]

Stundum er jafnvel haldin hátíð í tilefni þess að þessi eða hinn hefði orðið 210 ára....ef hann hefði lifað... Góður pistill hjá þér, að vanda.

[Ásdís Sigurðardóttir, 15.6.2007 kl. 19:17]

Var komin með komment þegar allt datt út, klaufinn ég, en veistu nokkuð hvenær Clinton lendir ?

[Jón Steinar Ragnarsson, 21.6.2007 kl. 17:40]

Hvergerðingar fara suður til reykjavíkur og eins er með austfirðinga.  Vestfirðingar hafa þessa afstöðu rétta, sem liggur í hlutarins eðli.  Reykvíkingar eru enn að fara vestur á firði, þótt þeir þurfi að ferðast í há-norður. 

[Skafti Elíasson, 28.6.2007 kl. 00:36]

Alveg eins og það er skrítið að Vestfirðingar fari norður til Akureyrar.