Ísafjörður: Við skál síðan fyrir jól

Slétt silfurplata er hömruð á steðja - dögum saman, vikum saman. Reyndar er hún ekki lengur slétt; við fyrsta högg byrjar hún að taka á sig mynd. Nákvæmlega þar sem platan nemur við steðjann þarf hamarinn að hitta. Við það þenst silfrið og þéttist. Með kerfisbundinni nákvæmni, með tilfinningu fyrir efninu, og með óbilandi þolinmæði, er hægt að gefa silfrinu form á þennan einfalda en ákaflega seinlega hátt. Við hömrun harðnar silfrið og hættir að láta að stjórn. Svo að silfrið rifni ekki þarf að glóðhita það. Þá verður það aftur mjúkt. Og áfram er haldið að hamra. Pétur Tryggvi Hjálmarsson silfursmiður á Ísafirði hefur verið að hamra eina plötu síðan fyrir jól - í meira en tvo mánuði. Platan verður smátt og smátt að einhverju. Platan og maðurinn eigast við. Þegar vel gengur verður hún listaverk; maðurinn listamaður. Skál! 

                  

           

                  

                

                

30.12.2006 Pétur Tryggvi - bæjarlistamaður Ísafjarðarbæjar

Athugasemdir

[Heiða B. Heiðars, 27.2.2007 kl. 00:28]

Vá! Glæsilegir gripir!

[Hlynur Þór Magnússon, 27.2.2007 kl. 00:29]

Þetta er allt sami gripurinn ...!

[Halldór Egill Guðnason, 27.2.2007 kl. 10:56]

Glæsilegur gripur. Hugmyndaflug, elja, natni og nákvæmni. Þar skilur á milli okkar meðaljónanna og listamannsins. Enn og aftur, glæsilegur gripur.

[Snorri Hansson, 27.2.2007 kl. 11:51]

Undurfögur skál !!

[birna, 27.2.2007 kl. 15:01]

ótrúlega fallegur hlutur !

[Heiða B. Heiðars, 27.2.2007 kl. 17:53]

Ómæ!!! Sé það núna! Frábært.... hvað ætli maður þurfi að reiða fram marga peninga fyrir svona skál?

[Hlynur Þór Magnússon, 27.2.2007 kl. 23:13]

Hvor mange penge?

Á listaverkasölu erlendis myndi þessi skálar-skúlptúr Péturs Tryggva væntanlega kosta sem svarar um 2,5 milljónum króna. Áður hefur hann smíðað þrjár skálar í sama stíl, sem hann hefur þróað sjálfur eins og öll sín verk, en allar minni en þessa. Tvær af þeim voru seldar í galleríi í Danmörku á síðasta ári fyrir sem svarar um 1,8 og 1,2 milljónum íslenskra króna. Þá þriðju og minnstu smíðaði hann samkvæmt pöntun hérlendis fyrir tæpa hálfa milljón króna. Þess ber að geta, að fyrir skálarnar sem fyrr voru nefndar fékk listamaðurinn í sinn hlut einungis um helming af söluverðinu í listaverkasölunni.

 

Loks skal áréttað að Pétur Tryggvi er meðal virtustu silfurlistamanna Danmerkur, þar sem hann starfaði um langt árabil, og þar með einn af þeim bestu í heimi ...

http://www.alia.dk/tryggvi/achievements.asp