Kötturinn og rjúpurnar

Heimiliskötturinn fór út að fá sér frískt loft í gærmorgun eins og venjulega. Svo leið og beið og ekkert bólaði á honum. Þegar að var gætt voru sex rjúpur á beit í garðinum (ef sagt er að rjúpur séu á beit), aðeins fáeina metra frá húsinu. Kötturinn er bráðungur og virðist ekki mjög hugumstór. Að minnsta kosti lét hann ekki sjá sig fyrr en rjúpurnar voru farnar.

  

Heimsókn rjúpnanna bar upp á annan jóladag. Þær hafa líklega talið sér óhætt þar sem heilt ár er þangað til jólarjúpur verða næst á borðum.

  

Í dag hefur kötturinn ekki viljað fara út.

  

Athugasemdir

[Hlynur Þór Magnússon, 27.12.2006 kl. 21:13]

Vonandi vex honum hugur og ásmegin með aldrinum þannig að hann veiði rjúpur í jólamatinn að ári ...

[erlahlyns.blogspot.com, 28.12.2006 kl. 19:18]

Ég frétti af ketti sem nú fyrir jólin kom heim með nokkrar rjúpur, samanbundnar. Fallega hugsað hjá honum, nú þegar svo erfitt virðist að fá rjúpur á diskinn sinn. Fyrrum eigendur rjúpnanna hafa þó líklega ekki hugsað fallega til hans.

[Hlynur Þór Magnússon, 28.12.2006 kl. 22:22]

Þó það nú væri, Anna! Það er stutt síðan ég frétti af talsvert miklum skyldleika okkar - frændgarður í Kjósarsýslu sálugu. Þú ættir að vita þetta flestum betur - ég sé á heimasíðunni þinni að þú ert í stjórn Ættfræðifélagsins.